Месси ҳақ бўлиб чиқди

Каталония клуби Англияда 0:4 ҳисобида таслим бўлди, бироқ Дембеле ўша голни урганида...

"Барселона" ҳамда "Ливерпуль" ўртасидаги "Камп Ноу"да бўлган баҳсни ёдга оламиз. Учрашувнинг 96-дақиқаси, "қизиллар" 0:3 ҳисобида мағлуб бўляпти ва тўпни бурчакдан ўйинга киритишмоқда. Пике бош билан тўпни Дембелега ташлаб берди.

Месси, Пике ва Дембеле катта тезликда қарши ҳужумга ўтишди ва майдоннинг нариги томонигача етиб боришди.

Дарвозага 12 метр қолганида Дембеле очиқ турган Мессига пас берди.

Рақибнинг уч футболчиси эътиборини ўзига қаратган Лео тўпни Дембелега қайтаради. Ажойиб вазият!

Усмон 13 метрлардан дарвозага зарба берди, аммо зарба футболчи кутгандек бўлмади ва Алиссон тўпни эгаллаб олди.

Кипер тўпни майдонга ташлаши билан ҳакам ўйин якунланганини билдирувчи хуштакни чалди. Дембеле айбдорлигини билиб, атрофга қараяпти, майдонда ётган Месси эса мамнун эмас.

Ўйиндан кейин Лео шундай деганди: "Баҳсдаги сўнгги вазият... Дембеле гол уриши керак эди. Шунда "Энфилд"да осонроқ бўлади. Аммо 3:0 ҳам ажойиб натижа".

"Энфилд" эса охиригача ўйнаш кераклигини исботлаб берди.