Matchday: Супер ўйинлар превьюси

Дастлабки эътиборга молик ўйин Англия премьер лигасининг 8-тури доирасида "Ливерпуль" ҳамда "Манчестер Юнайтед" ўртасида кечади.

Чемпионатни йўқотишларсиз ўтказаётган Моуринью жамоасини бу гал анча қийин ва жиддий сафар кутмоқда. Юрген Клопп ҳамкасби Моуриньюга "Энфильд"да "қайноқ душ" тайёрлаб қўяётган бўлса ажаб эмас.
Айни пайтда турнир жадвалида 7-ўринда бораётган "Ливерпуль" учун бу ўйин ҳам принципиаль, ҳам турнир жадвали нуқтаи назаридан катта аҳамиятга эга.
Юрген Клопп ҳамда Жозе Моуринью ўртасидаги ўзаро қарама-қаршилик ҳам алоҳида аҳамият касб этади. Бу мураббийларнинг ўтган йилги ўзаро тўқнашувида ҳар иккала баҳсда ҳам ғолиб номи аниқланмаганди.
Бу сафар омад ким тарафида бўлади, буни вақт кўрсатади.

Жамоаларнинг ҳозирги ҳолатидан келиб чиқадиган бўлсак, "Ливерпуль" катта тезликда кетаётган "Манчестер Юнайтед"ни тўхтатиб қолиши керак бўлади. Буни уддалаш эса уларга осон бўлмаслиги аниқ.
Ҳар иккала жамоанинг ҳам таркибларида сезиларли йўқотишлар мавжуд.
Мерсисайдликлар етакчиси Садио Мане жароҳати боис ўйинни ўтказиб юборади. Шунингдек, Наталиан Клайн ҳамда Адам Лаллана ҳам жароҳатлари туфайли учрашувда иштирок этишмайди.
Моуринью олдидаги йўқотишлар ҳам "Ливерпул"никидан кам эмас. МЮдаги йўқотишлар бирмунча каттароқ. Поль Погба кетидан эндиликда Маруан Феллайни ҳам жароҳатланди. Майкл Кэррик, Златан Ибрагимович ҳамда Маркос Рохо ҳам анчадан буён яшил майдондан четда қолмоқда.

АПЛ, 8-тур.
"Ливерпуль" - "Манчестер Юнайтед" (16:30)
"Энфильд" стадиони.
Бош ҳакам: Мартин Аткинсон

Бугун намойиш этиладиган футболга оид кўрсатувлар жадвали (Setanta Sports, Спорт ТВ, Матч ТВ, Футбол ТВ)

Куннинг яна бир марказий ўйини Италия А Сериясида ўтказилади.
Яқиндагина Италия суперкубогида тўқнаш келган "Ювентус" ҳамда "Лацио" жамоалари энди чемпионат доирасида ўзаро ҳисоб-китобни амалга оширади.
Ўтган турда "Аталанта" билан бўлган баҳсда ғалабани қўлдан чиқарган "Юве"ни ўз уйида жиддий чорлов кутмоқда. Суперкубок баҳсида "Юве"ни, чемпионат доирасида эса кучаётгани кўп бор таъкидланган "Милан"ни савалаган "Лацио" яқинда "Наполи" томонидан тўхтатилганди. Аммо Симоне Инзаги қураётган жамоа ўйиндан-ўйинга кучайиб, шаклланиб бораётгани шундоқ кўзга ташланмоқда. Жамоа тўпурари Чиро Иммобиле ўтказилган сўнгги 10 ўйинда рақиблари дарвозасини 11 маротаба ишғол этгани "Лацио"ни ҳозирги кунда қандай жиддий жамоага айланганидан дарак бериб турибди. Жамоа ҳам ўйин сифати жиҳатидан ҳам, натижалар бобида ҳам кўтарилиш жараёнини бошдан кечирмоқда. Гарчи Туринда ўйнайдиган бўлсада, бу Инзаги бошқарувидаги "Лацио" "Альянц стэдиум"да ҳам Аллегрига етарлича бош оғриқ тақдим этишга қодир.
"Ювентус" эса энди очко йўқотишга ҳаққи йўқ. Чунки жамоа шундоқ ҳам "Наполи"ни қувувчи ролига тушиб қолди. Буёғига жамоа ўртадаги фарқни янада ошириб юбормаслиги учун ҳам ғалаба қозонишга мажбур.

"Ювентус" лазарети ҳимоячилар "армия"си билан тўлган, десак муболаға бўлмайди. Бенедикт Хёведес, Андреа Барцальи, Де Шильо, Даниеле Ругани шулар жумласидандир.
Шунингдек, эндигина жароҳатидан фориғ бўлаётган Сами Хедирани ҳам бу ўйинда иштирок этмаслиги эҳтимоли юқори.
"Лацио"да ҳам йўқотишлар етарлича. Жамоа етакчилари Фелипе Андерсон, Валлас, Лукаку, Баста, Бастос ҳамда жамоа дарвозабони Стракошада ҳам жароҳат бор. Симоне Инзаги олдида танлов анча чекланган. Бу эса амалдаги чемпионга қарши ўйин олдидан Инзагини бошига ортиқча ташвиш туғдириши аниқ.

А Серия, 8-тур.
"Ювентус" - "Лацио" (21:00)
"Альянц Стэдиум" стадиони.
Бош ҳакам: Паоло Силвио Маззолени.

А Сериядаги яна бир эътиборга молик ва диққат-марказда бўладиган беллашув Римда ўтказилади.
Чемпионат пешқадами "Наполи" яна Римга сафар қилади. Уларнинг яқиндаги сафари анча омадли ва муваффақиятли чиққанди. Аммо бу галги рақиб Римнинг бошқа жамоаси - "Рома".
Маурицио Сарри бу сафар энди "Рома" қаршилигини синдиришга уриниб кўриши лозим. Унга ўтган йилгидек Спалетти эмас, балки жамоа рулига яқиндагина келган Эйсебио Ди Франческо тактик кураш тақдим этишга ҳаракат қилади.Бу жамоаларнинг ўтган мавсумдаги ўйинлари анча ғалати ўтган. Римда "Наполи" ғалаба нашидасини сурган бўлса, Неаполда "Рома" ишончли ғалабани тантана қилганди. Жорий мавсумда воқеалар ривожи қандай тус олишини тахмин қилиш қийинроқ. Ўйин, таркиб, ҳамда турнир жадвалидаги вазитдан келиб чиқадиган бўлсак, "Наполи" бу тўқнашувда фаворитдек, таассурот қолдиради. Аммо Римда "Рома" ўз улишини бегоналарга шундоқ топшириб қўядиган анойи жамоалардан ҳисобланмайди.
Гарчи бир қатор етакчи футболчилари тарк этган бўлсада, "Рома" айнан "Наполи"га қарши ўйинда нималарга қодир эканлигини исботлаш учун ҳам икки хисса куч билан ўйнаши аниқ. Эйсебио Ди Фраческо ҳам мураббий сифатида ўз салоҳиятини намойиш этиши учун ажойиб имконият.
Маурицио Сарри эса "Ювентус" билан орадаги фарқни сақлаб қолиш учун ҳам ғалаба қозониши шарт. "Наполи" жадвалда якка ҳокимга айлангани уларнинг иштаҳасини янада оширган бўлиши табиий. Бу жиҳат уларни бўшашишларига эмас, аксинча мотивацияни янада кучайишига хизмат қилиши кераклигини Сарри тушуниб турибди.
Бу жамоаларнинг ўтказган сўнгги 16 учрашувидан кейин кучлар тенг. "Рома"да 7 ғалаба, "Наполи"да ҳам шунча ғалаба ва 2та ўйинда дуранг қайд этилган.

Жамоа таркибларида йўқотишларга тўхталадиган бўлсак, "Рома"да Де Россини ўйнаши сўроқ остида турибди. Шунингдек, Эль-Шаарави ҳам кичик жароҳати туфайли ўйинда иштирок этиши номаълум бўлиб турибди. "Рома"нинг янги хариди Патрик Шик эса ҳали яшил майдонга қайтгани йўқ. Кевин Строотман ҳамда Диего Пероттини ҳам йўқлиги жамоа учун йўқотиш.

"Наполи"да эса иккита етакчи футболчилар жароҳатланган. Аркадиуш Милик узоқ муддатга сафдан чиққан бўлса, Файзи Гуламнинг "Рома" билан ўйинда иштирок этиши номаълум.

А Серия, 8-тур.
"Рома" - "Наполи" (23:45)
"Стадио Олимпико" стадиони.
Бош ҳакам: Жанлука Рокки.

Германия Бундеслигасида ҳам бугун катта афишали ўйин бор. Дортмундда маҳаллий "Боруссия" жамоаси ўтган йили катта шов-шув кўтарган "Лейпциг"ни меҳмон қилади. Жорий мавсумни янги бош мураббий Петер Бошш муваффақиятли ўтказаётган Дортмунд учун "Лейпциг" тўсиғи қанчалик қийин бўлишини ўйин кўрсатади. Ўтган мавсумда ушбу жамоалар ўртасидаги ҳар иккала ўйинни ҳам биргина гол ҳал этганди. Дортмунддаги баҳсда мезбонлар зафар қучишган бўлса, меҳмонда "Боруссия" "Лейпциг" олдида ожиз қолганди.
Бу сафар ҳам ўтган йилги сценарий такрорланадими?
"Боруссия" айни пайтда Бундеслигада катта тезлик билан ҳаракатланмоқда ва "Бавария"ни 5 очкога ортда қолдирмоқда. Бошш эса ушбу фарқни қисқаришини истамайди ва жамоа "Лейпциг" билан бўладиган баҳсга анча жиддий ёндошиши аниқ. Ралф Хаззенхюттль бошчилигидаги "буқалар" пешқадамдан 6 очкога, иккинчи поғонада бораётган "Бавария"дан эса 1 очко кам жамғарган. Дортмунддаги қоқилиш эса уларни кучли учталикдан узоқлашиб қолишларига сабабчи бўлиши мумкин.
Шу боисдан ҳам "буқалар"ни Дортмунд сафаридан кўзлаган мақсадлари минимум 1 очко.
"Лейпциг" ҳозирча бундеслигада ҳеч ким уддалай олмаётган нарсани, яъни "Боруссия"ни мағлуб этишни биринчилардан бўлиб амалга оширишга катта куч сарфлаб кўриши аниқ.

Дортмунд таркибида йўқотишлар анчагина кўп. Марко Ройс, Андре Шюррле, Марсель Шмельцер, Рафаэль Геррейру, Себастьян Роде, Маҳмуд Дауд, Лукаш Пишек ҳамда Эрик Дурм жароҳатларини даволашмоқда.
"Лейпциг"да эса Илсанкер ҳамда Колтортидан ташқари анчагина жиддий йўқотиш мавжуд - Тимо Вернер. Жамоа тўпурари Германия терма жамоаси машғулоти пайтида оёғини шикастлаб олганди. Унинг ҳозирги ҳолати номаълум. Хаззенхюттль жамоанинг асосий "қуроли"дан фойдалана олиш ёки олмаслиги номаълум.

Бундеслига, 8-тур.
"Боруссия" Дормтунд - "Лейпциг" (21:30)
"Сигнал Идуна Парк" стадиони.
Бош ҳакам: Дениз Айтекин.

Яна бир катта ўйин Испания Ла Лига доирасида Мадридда бўлиб ўтади. Турнир пешқадами "Барселона" Мадридга сафар қилади. Аммо рақиби "Реал" эмас, каталонияликлар принципиаль жиҳатдан иккинчи даражали рақиб "Атлетико" Мадрид меҳмони бўлади.
Бу жамоалар ўртасидаги ўзаро қарама-қаршилик доимо юқори шиддат ва кескин курашлар остида ўтган. Ҳеч ким тўхтата олмаётган "Барселона"ни "Атлетико" тўхтатиб қоладими, деган саволга жавоб оламиз.
Сўнгги бор айнан Мадридда мағлубиятга учраган "Барселона" учун Мадрид сафари яна муваффақиятсиз чиқадими, деган савол ҳам кўпчиликни қизиқтирмоқда.
Диего Симеоне "Барселона"га қарши қандай ўйнаш ва қайси тактикани танлашни жуда яхши билади. Эрнесто Вальверде эса шу ўринда ҳамкасби Симеоне билан биргаликда "Атлетико" билан ҳам яхши таниш.
Бу жиҳатлар ким кўпроқ унумли фойдаланишини эса вақт кўрсатади.
Турнир жадвалида 4-ўринда бораётган "Атлетико" кучли-учликка кириб олиш учун ҳам ўз уйидаги бу баҳсни ютишига тўғри келади. "Барселона" эса якка ҳокимликни янада мустаҳкамлаш мақсадида ғалабани кўзлаши кундек равшан.
Қизиқ жиҳати шундаки, примерода "Атлетико" жамоаси ўз уйидаги баҳсларда "Барселона"ни 7 йилдан буён мағлубиятга учрата олмай келмоқда. Бу нохуш серия яна давом этадими?
Шуни алоҳида қайд этиш керакки, "Барселона" энди "Атлетико"нинг янги стадионига ташриф буюради. "Висенте Кальдерон"даги муваффаиятли серияни янги стадионда ҳам давом эттириш каталонияликлар учун осон бўлмаслиги аниқ.

Лазаретларга келадиган бўлсак, "Атлетико"да фақатгина Луис Фелипе ҳамда Симе Врсалько ўйинни ўтказиб юбориши мумкин.
"Барселона"да эса йўқотишлар анча кўп ва етакчилар хизматидан каталонияликлар фойдалана олишмайди.
Андрес Иньеста, Луис Суарес, Усман Дембеле ҳамда Рафинья "Барселона" лазаретини тўлдириб туришибди.

Ла Лига, 8-тур.
"Атлетико" - "Барселона" (23:45)
"Эстадио Ванда Метрополитано" стадиони.
Бош ҳакам: Антонио Матеу.

Шунингдек, бугун Бундеслигада Юпп Хайнкесни қайтарган "Бавария" ўзининг эски-янги бош мураббийи қўли остида "Фрайбург"ни қабул қилади.
Ўтган турда "Сити"дан мағлубиятга учраган "Челси" ҳали ҳам гол уролмаган "Кристал Пэлас" меҳмони бўлади.
"Манчестер Сити" эса "Сток Сити" билан тўқнаш келади.
"Тоттенхэм" эса "Борнмут" билан баҳс юритади.
Ла Лигада ишлари юришмаётган Испаниянинг амалдаги чемпиони "Реал" эса "Гетафе"га сафар уюштиради.
Даҳшатли учликни пайдо қилган ПСЖ эса "Дижон" билан сафарда ўйнайди.
Европа чемпионлар лигасисиз қолиб кетган "Арсенал" "Уотфорд" билан меҳмонда куч синашади.

АПЛ, 8-тур.
"Ливерпуль" - "Манчестер Юнайтед" (16:30)
"Бёрнли" - "Вест Хэм" (19:00)
"Кристал Пэлас" - "Челси" (19:00)
"Манчестер Сити" - "Сток Сити" (19:00)
"Суонси" - "Хаддерсфилд" (19:00)
"Тоттенхэм" - "Борнмут" (19:00)
"Уотфорд" - "Арсенал" (21:30)

Франция 1 дивизиони, 9-тур.
"Дижон" - ПСЖ (20:00)
"Каен" - "Анжер" (23:00)
"Генгам" - "Ренн" (23:00)
"Лилль" - "Тройес" (23:00)
"Сент Этьен" - "Метц" (23:00)
"Тулуза" - "Амиенс" (23:00)

Бундеслига, 8-тур.
"Бавария" - "Фрайбург" (18:30)
"Ганновер" - "Айнтрахт" (18:30)
"Герта" - "Шальке" (18:30)
"Хоффенхайм" - "Аугсбург" (18:30)
"Майнц" - "Гамбург" (18:30)
"Боруссия" - "Лейпциг" (21:30)

А Серия, 8-тур.
"Ювентус" - "Лацио" (21:00)
"Рома" - "Наполи" (23:45)

Ла Лига, 8-тур.
"Атлетик" - "Севилья" (16:00)
"Гетафе" - "Реал" (19:15)
"Алавес" - "Реал Сосьедад" (21:30)
"Атлетико" - "Барселона" (23:45)

Бугун намойиш этиладиган футболга оид кўрсатувлар жадвали (Setanta Sports, Спорт ТВ, Матч ТВ, Футбол ТВ)