"Мальорка"нинг кореялик футболчиси Тошкентдаги илк ўйиндан сўнг фикрларини билдирди

Кеча Жанубий Корея ва Малайзия терма жамоалари ўртасидаги ўйинда кореяликлар 4:1 ҳисобида ғалаба қозонишди. 

Учрашувдан сўнг баҳснинг энг яхши футболчиси, "Мальорка" клуби ва Жанубий Корея терма жамоаси аъзоси Ли Канг-Ин микст-зонада ўз фикрларини билдирди. 

"Биз бир жамоа бўлиб ғалаба қозонишга ҳаракат қилдик, қониқарли натижага эришганимиздан хурсандман. 

Футболчилар терма жамоага йиғилганига кўп вақт бўлмади, шу сабабли баъзи камчиликлар кузатилган бўлиши мумкин. Ўйлайманки, келгуси баҳсларда бундан-да яхшироқ ўйин намойиш этамиз. Нафақат мен, балки жамоадаги барча ўйинчилар шундай мақсадни ўз олдига қўйишган. Навбатдаги ўйинларгача жамоадошлар билан бир-биримизни мукаммал тушуниб борамиз ва бўлажак учрашувларда ғалаба қозонишимиз учун ҳозиргидан кучлироқ тайёргарлик кўрамиз.

Мен ҳар доим жамоага ёрдам бериш учун ҳаракат қиламан. Бугунги баҳсда ҳам нафим текканидан хурсандман. Агар кейинги ўйинда менга имконият берилса, ўз устимда янада қаттиқроқ меҳнат қиламан", - деди футболчи.