“Локомотив” – “Насаф” олдидан. Хайрулла Холиқов: “ОЧЛдан эрта чиқиб кетган жамоалар баҳси”

Учрашувга бўлган қизиқиш ҳаминқадар юқори. “Локо”ни қабул қилиб олганига ҳали кўп бўлмаган Вадим Абрамов бугун Рўзиқул Бердиевга қарши баҳс олиб боради.

Бу ўйинни бемалол ОЧЛни эрта тарк этган жамоалар баҳси деб аташимиз мумкин. Биласиз, ҳар икки жамоа ОЧЛ плей-офф босқичидан ўта олмади ва эндиликда бор эътиборини ички чемпионатга қаратиши турган гап. Ўтган йил Тошкентда бўлиб ўтган беллашувда “Локо” 2:0 ҳисобида зафар қучган, бу сафар ҳам майдон эгаларининг имконияти юқоридек кўринмоқда.

Бугунги ўйинда Абрамов – Бердиев қарама-қаршилигидан ташқари футболчилардан ким кучли деган саволга жавоб олсак ажаб эмас. Нестеровми, Суюновми? Ҳамза Каримовми, Ислом Тўхтахўжаевми? Артур Геворкянми, Жасур Ҳасановми? Илҳом Шомуродовми, Иван Нагаевми? Илҳом Юнусовми, Дилшод Жабборовми? Хуллас, кўп саволларга жавоб оламиз.