"Локомотив" Жепаровни истеъфога чиқарди

"Кеча бўлиб ўтган Суперлига 22-тури доирасидаги "Локомотив" – "Олимпик" учрашувидан сўнг "темирйўлчилар" бош мураббийи Сервер Жепаров клуб раҳбарияти томонидан истеъфога чиқарилди.

"Локомотив" кеча жуда муҳим беллашувда 1:2 ҳисобида имкониятни бой берди. Бу эса клуб раҳбариятининг кескин қарор қабул қилишига сабаб бўлди.

Суперлига баҳсларининг қолган 4 та турига асосий жамоамизни таниқли ва тажрибали мутахассис Мирко Еличич бошқаради. Австралиялик мураббий илтимосига биноан Денис Коростиченко ҳам мураббийлар штабига қайтиб, Еличичга яқиндан ёрдам беради. 

Жамоамизга қолган тўрт ўйинда фақат ва фақат омад тилаймиз! Бизни олдинда "Пахтакор", "Навбаҳор", "Сўғдиёна" ва "Металлург" билан кечадиган қийин учрашувлар кутмоқда, лекин таслим бўлиш йўқ. "Локомотив" Суперлигада ўз ўрнини сақлаб қолиши учун охиригача курашади", – дейилади клуб расмий хабарида.

Маълумот учун, Тошкент клуби 22 турдан кейин 20 очко тўплаб, мусобақа жадвалида 11-ўринда боряпти.