“Локомотив-2004″ – хотира турнирида учинчи ўрин соҳиби!

Бунда “Локомотив” футбол мактабининг 2004/2005 йилда туғилган тарбияланувчилари ҳам иштирок этиб, ёш “темирйўлчилар” якунда учинчи ўринни қўлга киритишди.

Айтиш мумкинки, Отабек Мансуров ва Дилшод Атамуҳамедов бошқарувидаги “Локо-2004/2005″ турнир давомида энг чиройли ўйин кўрсатган жамоа бўлди. Буни “Локомотив” иштирокидаги ўйинларни четдан кузатган мутахассислар, мухлислар ҳамда ота-оналар ҳам эътироф этишди. Футбол мактабимиз тарбияланувчилари тўртта ўйин ўтказган бўлса, шундан бирортасида гол қўйиб юборишмади. Бу ҳам таҳсинга лойиқ албатта.

“Локомотив-2004/2005″ дастлаб “Самарқанд” жамоасини 3:0 ҳисобида мағлуб этди. Гуруҳдаги иккинчи ўйинда Отабек Мансуров шогирдлари БЎСМ-16 устидан 2:0 ҳисобида зафар қучишди. Аммо ярим финал беллашувида омад биздан бирозгина юз ўгирди. РОЗК билан кечган баҳснинг асосий вақтида ҳисоб очилмади. Шундан сўнг навбат пенальтилар сериясига етиб келди ва бунда футболчиларимиз 6:7 ҳисобида ютқазиб қўйишди.

Бугун ЎФФ сунъий майдонида бўлиб ўтган учинчи ўрин учун беллашувда эса “қизил рицарлар” пойтахтнинг яна бир жамоаси “Спартак”ка қарши тўп суришди. Энг қизиғи, бу ўйинда ҳам ҳисоб очилмади ва навбат яна пенальтилар сериясига етиб келди. Бунда эса “Локомотив” футболчилари 9:8 ҳисобида рақибдан устун келишди.

Мусобақа якунида одатдагидек ғолиб ва совриндорларни тақдирлаш маросими ташкил этилди. Наримон Жалолов ва Тўлаган Исоқов бошчилигидаги ЎФФ фахрийлар кенгаши вакиллари ҳамда Баҳодир Ибрагимовнинг оила аъзолари ғолибларни тақдирлашди. “Локомотив” ҳужумчиси Асамжонов Саидакмал мусобақанинг “Энг яхши ҳужумчиси” деб топилди.