Легионерлар. Олти нафар футболчимиз учун мавсум тугади

Хусусан, Виталий Денисов “Локомотив” сафида учинчи ўринни қўлга киритган бўлса, Одил Аҳмедов тўп тепган “Анжи” чемпионатда охирги ўринни эгаллаб, биринчи дивизионга тушиб кетди. Россия биринчи лигасида ўйнаётган Вадим Афонин жамоаси “Газовик” эса  мавсумни бешинчи ўринда тугатди.

Бу йилги мавсумни Туркия биринчи лигасида ўтказган Дилшод Раҳматуллаев учун чемпионат ўртача кечди. Унинг клуби “Шанлиурфаспор” 11-ўринни қўлга киритди.

БААда ўйнаган икки легионеримиз Азиз Ҳайдаров билан Ойбек Қиличев учун ҳам мавсум икки хил якунланди. Азиз Ҳайдаров тўп тепаётган “Ал Шабаб” 4-ўринни эгаллаган бўлса, Ойбек Қиличев ўйнаган “Ал Шааб” кучлилар сафини тарк этди.



РОССИЯ. Премьер-лига
Виталий Денисов (“Локомотив”)
“Локомотив” чемпионатни учинчи ўринда тугатди. Виталий Денисов ажойиб мавсумни ўтказди. Аксарият ўйинларда етакчи сифатида ҳаракат қилди. Бир неча бор тур рамзий термасига киритилди.

Одил Аҳмедов (“Анжи”)
“Анжи” учун жорий мавсум жуда омадсиз келди. Клуб охирги ўринни олиб элитадан тушиб кетди. Аммо Одил Аҳмедов ўзидан яхши таасурот қолдирди. У жамоасининг деярли барча ўйинларида қатнашиб 90 дақиқадан ҳаракат қилди.



РОССИЯ. Биринчи дивизион
Вадим Афонин (“Газовик”)
“Газовик” Россия биринчи дивизионида 19 жамоа орасида 5-ўринни эгаллади. Бу клубда фаолиятини ўтказган Вадим Афонин учун ушбу чемпионат яхши кечди. Футболчимиз деярли барча ўйинларда 90 дақиқадан тўп тепди.

ТУРКИЯ. 1-лига
Дилшод Раҳматуллаев (“Шанлиурфаспор”)
Туркия биринчи лигасида ҳозирча кучли олтиликка кирган клублар ўртасида плей-офф баҳслари ўтказилмоқда. Дилшод Раҳматуллаев клуби “Шанлиурфаспор” 19 жамоа орасида 11-ўринни қўлга киритди. Демак, Раҳматуллаев учун ҳам мавсум тугади. Дилшод ўзининг янги жамоасида ўртача ўйин кўрсатди.

БАА. Премьер-лига
Азиз Ҳайдаров (“Ал Шабаб”)
“Ал Шабаб”нинг учинчи ўринни олишига озгина етмади. Жамоа “Ал Жазира”дан атиги бир очко кам тўплаб, тўртинчи ўрин билан кифояланди. Ҳайдаров учун эса мавсум ўртача кечди. У кўп учрашувларда жамоа етакчиси сифатида намоён бўлди.



Ойбек Қиличев (“Ал Шааб”)
БАА чемпионатида 14та клуб иштирок этади. Ойбек Қиличев тўп тепган “Ал Шааб” охирги ўринни олиб премьер-лигадан тушиб кетди. “Ал Шааб” атиги 13 очко жамғарди. Бу эса Қиличевга ҳам таъсир кўрсатмай қолмади. Катта эҳтимол билан у ортга қайтиб келса керак.

Хайрулла Холиқов.