Куртуа: “Ҳакамларнинг бир қатор қарорлари “Реал”ни ғалабадан маҳрум қилди”

“Охир оқибат “Атлетико” Ла Лигани бой бериб, чемпионлик бизга насиб этиши мумкин эди. Ҳа, улар анча вақт турнир жадвалида етакчилик қилишди ва якунда ғолиб бўлишди. Аммо бир қатор ўйинларда ҳакамларнинг қарорлари бизни ғалабадан маҳрум этди.

Албатта, турнирда ғолиб бўла олмаганимиздан хафа бўлдик, аммо футбол шунақа. Мавсумнинг иккинчи ярмини жуда яхши ўтказдик. Муҳим ўйинларда ғолиб чиқдик. Даражаси бирмунча пастроқ жамоалар билан ўйинларда қўпол хатоларга йўл қўйдик.

ЕЧЛ ярим финалида “Челси”га қарши баҳсда бизга омад кулиб боқмади. Жароҳатлар, коронавирус билан боғлиқ ҳолатлар таркибимизга жиддий таъсир қилди. Умуман олганда лондонликлар иккинчи учрашувда кучлироқ эканликларини кўрсата олишди. Якунда эса улар турнирда ғолиб чиқиб, Тухел келгач жамоанинг ҳақиқий даражасини кўрсатиб бера олди”, дея Куртуанинг сўзларидан иқтибос келтирмоқда Le Soir.