Крушельницкий ўз жамоаси билан суперлигага чиқди

Марказий ҳимоячимиз жамоаси сўнги турларни жуда муваффақиятли ўтказди. “Фелда” 5 учрашувда 13 очко жамғарди: “Жохор Дарул Таъзим II” билан сафарда 1:1, 2-ўрин учун бўлган курашдаги асосий рақиб “Пулау Пинанг” билан уйда 4:1, премьер-лига ғолиби бўлган “Полис” билан меҳмонда 1:0, “Университет ТМ”ни уйда 8:0 ҳамда “Перлис”ни сафарда 3:2.
Шу тариқа, умумий ҳисобда 50 очко жамғарган ҳамда “Полис”дан икки очко ортда қолган ҳолда, “Фелда Юнайтед” мусобақада 2-ўринни эгаллади. Ва ушбу икки клуб келаси мавсумда Малайзия суперлигасида ўйнайдиган бўлишди.
Энди июль ойининг ярмидан Малайзия кубоги беллашувлари бошланади ва то ноябргача давом этади. Мусобақада суперлига ва премьер-лига клублари аралаш ҳолда иштирок этишади.

Эслатиб ўтамиз, Крушельницкий “Фелда Ю” билан бунгача якунланган Малайзия футбол ассоциацияси кубогида финалгача етиб келиб, ҳал қилувчи ўйинда сўнги 10 дақиқа ичида ўтказиб юборилган иккита гол ҳисобига жуда ҳам аламли тарзда мағлубиятга учрашганди (1:2).