Каземиро: "Ҳар бир дақиқадан 15 ёшли боладек роҳатланяпман"

"Янги клубга келганингда, доим тарих яратишни орзу қиласан... Айниқса, бу клубнинг буюклигини кўрганингда. Бу ердаги мослашувимдан мамнунман. Жамоадошларим ва ходимлар менга катта ёрдам беришмоқда. Улар инглиз тили бўйича ҳам кўмаклашишади, бу қийинроқ бўлиб чиқди, лекин мен уни яхшироқ ўрганиш учун кўп ҳаракат қиляпман.

Биринчи кунданоқ бу ерда ўзимни уйдагидек ҳис қиляпман.  Шу ерда эканлигимдан ва 15 ёшли бола каби ҳар бир дақиқадан завқланаётганимдан жуда хурсандман! Лекин энг муҳими, жамоанинг ривожланишини кўриш. Биз тўғри йўлдамиз. Бу совринларни ютиш йўли, аммо биз ўсишда давом этишимиз керак", – деди Каземиро.

Бразилиялик ярим ҳимоячи 2022 йилнинг ёзидан буён "Манчестер Юнайтед"да тўп тепиб келмоқда. Унинг "қизил иблислар" билан шартномаси 2026 йилгача мўлжалланган.

Жорий мавсумда у "Манчестер Юнайтед" сафида барча турнирлар доирасида 28 та ўйинда қатнашиб, 4 та гол урди ва 5 та голли пас узатди.

Унинг клуби 20 ўйиндан кейин 39 очко тўплаган ҳолда АПЛ мусобақа жадвалида 4-ўринда бормоқда.