ЖЧ саралаш. Баҳрайн Украина билан ўртоқлик учрашуви ўтказади

Кейинги босқичга чиқиш учун ҳаракат қилаётган Баҳрайн терма жамоаси расмий ўйинлар олдидан иккита ўртоқлик учрашувида майдонга тушади. Дастлабки ўйин Украина термасига қарши ўтказилади. Терма жамоа бош мураббийи Элио Соуза навбатдаги йиғин учун 23 нафар футболчини таклиф этди.

Маълум бўлишича, баҳрайнликлар бугун мамлакат пойтахтида йиғилиб, беш кун машғулот олиб боришади. 20 май куни эса жамоа Киевга йўл олади ва орадан уч кун ўтиб Украинага қарши майдонга тушади. 24 май куни жамоа яна Баҳрайнга қайтиб келади ва Малайзия билан бўладиган навбатдаги  ўртоқлик учрашувига ҳозирликни давом эттиради.

"C" гуруҳи баҳслари марказлашган тартибда Баҳрайнда бўлиб ўтишидан хабарингиз бор. Ушбу жамоа ЖЧ саралаш баҳсларини Камбоджа (3 июнь), Эрон (7 июнь) ва Гонконг (15 июнь) терма жамоаларига қарши ўтказади.