Жавоҳир Расулов: “Ғалабали серияни давом эттирмоқчимиз”

-  Дербига юқори кайфиятда етиб келгандик. Майдонга рақибни мағлуб этишга ишонган ҳолда тушгандик ва вазифани уддаладик. “Қўқон-1912” жамоасини жамоавий ўйин ҳисобига таслим қилдик деб ўйлайман. Айтиш керакки, дербида “Нефтчи” Қўқон жамоасига қараганда кучлироқ ўйнади. Ўтган йили қўқонликлар бизни ўз уйимизда мағлуб этишганди. Шу сабабли ҳам беллашувда ғалаба учун жиддий кураш олиб бордик. Албатта ғалаба қозонганимиздан жуда хурсандман. Бизни олдинда осон бўлмаган баҳслар кутиб турибди. Мазкур учрашувларда ҳам ғалаба қозониб, муваффақиятли серияни давом эттирмоқчимиз. Шу ўринда бизни “Истиқлол” стадионида қўллаб-қувватлаб турган мухлисларга катта раҳмат айтмоқчиман. Уларнинг далдаси биз учун ҳар доим муҳимдир.

Рақиб ҳақида ҳам ёмон фикрда эмасман. “Қўқон-1912” жамоаси “Нефтчи” майдонидан очко олиб кетиш учун жиддий курашди. Рақиб сафидаги Отабек Ҳайдаров ва Отабек Зокиров каби юқори савиядаги футболчилар борлигини айтиб ўтишим мумкин. Шунингдек, Абдуллоҳ Олимов баҳс давомида жамоамиз етакчиси Мансур Саидовга яққол боғланиб ўйнади ва шу сабабли кўплаб вазиятларда ҳужум ташкил қилишда муаммога дуч келдик. “Қўқон-1912” -  яхши  жамоа. Уларга фақат бироз омад етишмаяпти.  Қўқон шаҳри клубига кейинги баҳсларда омад тилаб қоламан, - деб фикрларини якунлади Жавоҳир Расулов.

Эслатиб ўтамиз, Олий лига 11-тур доирасидаги “Нефтчи” – “Қўқон-1912” ўйинида майдон эгалари Шукурали Пўлатовнинг икки тўпи эвазига ғалаба қозонишди.

“Нефтчи” матбуот хизмати