Жасур Холтўраев: "Сурхон"нинг ғалабасига ҳисса қўшганимдан хурсандман"

 Шу куни термизликлар сафида Жасур Холтўраев жуда фаол ўйнади ва айнан унга нисбатан ишлатилган қўполликдан кейин бош ҳакам "Металлург" дарвозасига пенальти белгилади. Ўша пенальтидан урилган гол эса ўйин тақдирини ҳал қилди. Шу тариқа, Жасур Холтўраев championat.asia талқинига кўра 14-турнинг энг яхши футболчиси деб топилди. Биз бу борада ҳужумчининг фикрлари билан қизиқдик.

"Металлург" билан учрашувга жиддий ҳозирлик кўргандик. Бу якунда самарасини берди. Мухлисларимиз узоқ кутган ғалабани қўлга киритдик. Жамоамизга аввалги учрашувларда омад етишмади. Яна баъзи бир баҳсларда футболчиларимиз жароҳат олгани панд берди. Қолаверса захирамиз тор эди. Иккинчи даврада 5 нафар янги футболчи олинди. Эндиликда ҳар бир футболчи ўз позициясидаги ўрнини сақлаб қолиш учун астойдил курашади. Навбатдаги баҳсларда ҳам ғалаба учун майдонга чиқамиз. 

Учрашувнинг 60-дақиқасидан сўнг майдонда бир киши кам бўлиб қолдик. Бунинг натижасида услубимизни ўзгартириб қарши ҳужумлардан самара чиқаришга ҳаракат қилдик. Сўнгги дақиқаларда менда имконият бўлди. "Металлург" ҳужумга ўтиб ҳимояни эсдан чиқарганди.  Акбар Исматуллаевни алдаб ўтаётганимда у оёғимга халақит берди ва йиқтди. Ичимдан жуда хурсанд бўлдим. Никита Павленко нуқтага яқинлашаётганда вазият гол билан тугасин деб дуо қилиб турдим. Ғалабага оз бўлсада ҳиссамни қўшганимдан хурсандман",- дейди Жасур Холтўраев.

Суперлига. 14-тур лауреатлари