“Металлург” Жасур Холтўраев билан шартнома имзолади, Муҳаммад Исаев кетди

Жароҳати боис Туркия сафарига бора олмаган истеъдодли ҳужумчи Ислом Исоқжонов индивидуал шуғулланишни бошлади. Жамоанинг икки нафар иқтидорли ёш ўйинчилари Шаҳзодбек Неъматжонов ҳамда Ҳумоюншоҳ Сайётовлар эса пойтахтда – Ўзбекистон U-20 терма жамоаси йиғинида иштирок этаяпти. Бундан ташқари ҳам жамоа таркибида баъзи ўзгаришлар мавжуд.

Кеча “Металлург” қароргоҳини ярим ҳимоячи Муҳаммад Исаев эркин агент сифатида тарк этди. Бир неча мавсум жамоа таркибида самарали фаолият олиб борган тажрибали футболчи билан дўстона хайрлашилди. Муҳаммад Исаев энди эркин агент сифатида фаолиятини бошқа клубда давом эттиради. Биз Муҳаммад Исаевга “Металлург” ПФК раҳбарияти ва кўп сонли мухлислари номидан миннатдорлик билдирамиз ва унинг келгуси фаолиятига омад ёр бўлишини тилаймиз.

Бугун эса “Металлург” ПФК ўз таркибини бир нафар янги ўйинчи билан бойитиб олди. Ўтган мавсум Термизнинг “Сурхон” жамоасида тўп сурган ҳужумчи Жасур Холтўраев “Металлург” билан шартнома имзолади. Футболчилик фаолиятини 2017 йили Ғузорнинг “Шўртан” жамоасида бошлаган Жасур Холтўраев 2021 йилги мамлакат чемпионатида “Сурхон” сафида 25 та учрашувда майдонга тушди. Шуларнинг 18 тасини асосий таркибда бошлаган бўлса, 7 бор заҳирадан ўйинга қўшилди. Рақиблар дарвозасига 2 та гол киритди. 3 марта сариқ карточка билан жазоланди. “Металлург”нинг аҳил оиласига хуш келибсан, Жасур!", - деб ёзади "Металлург" матбуот хизмати.