Жасур Абдураимов: "Урғуни 1997 йилда туғилганларга қаратамиз"

"22 февраль куни йиғинни бошладик. Ўша куниёқ Қозоғистон клуби билан ўртоқлик учрашувида майдонга тушдик. Кеча машғулот ўтказдик ва бугун "Қизилқум" билан ўйнадик.

Бир қатор янги футболчиларни синовдан ўтказиб олдик. Қисқа вақт йиғин ўтказган бўлсак ҳам анча фойдали бўлди дея оламан. Асосий мақсадимиз бу жамоани 70 фоиз 1997 йилда туғилган футболчилардан тузиш. Қолган 30 фоизини 1995 ва 1996 йилда таваллуд топган футболчилар ташкил этади. Сабаби 1997 йилда туғилган йигитлар 2020 йилги Олимпиада ўйинлари саралашида иштирок этишади.

Кейинги йиғинни март ойида хорижда ўтказсак керак. Ҳозирча режамизда Қатарга бориш бор. Бироқ Осиё чемпионати саралаш босқичига қуръа ташлаш маросими 17 март куни бўлиб ўтади. Агар қуръада Қатарга тушиб қолсак бу Қатарга бормаслигимиз мумкин. Шу боис ҳозир аниқ жавоб бера олмайман. Барчаси қуръа ташлаш маросимидан сўнг аниқланади", - дейди Жасур Абдураимов.

Маълумот учун, 2018 йилги Осиё чемпионати саралаш босқичи шу йилнинг 15–23 июль кунлари бўлиб ўтади. Мусобақанинг финал босқичи эса 2018 йилнинг 9–27 январь кунлари Хитойда ўтказилади.

Нарзулла Сайдуллаев ёзиб олди