Жамолиддин Раҳматуллаев: "Пенальти йигитларимнинг руҳиятини синдиргани йўқ"

- Авваламбор, барчага раҳмат. Биз минимал вазифани бажардик. Барчани яқинлашиб келаётган Ҳайит айёми билан табриклаб қоламиз. Шунингдек, ғалаба билан ҳам табриклайман. Бу иш учун биз катта ҳаракат, меҳнат қилдик. Мураббийлар штабида жуда кўп инсон бирга меҳнат олиб бордик. Устозим Усмон Қудратович ҳам елкама-елка ёнимда турибдилар. Умуман олганда барчага катта раҳмат айтаман. 

Ўйинга келадиган бўлсам, жуда ҳам ажойиб ўйин бўлди. Ҳақиқий жангга қиёсласак бўлади. Баъзи вазиятларда йигитларим жуда қийин ҳолатга тушиб қолишди. Белгиланган 11 метрлик пенальтига қарамасдан болаларим руҳини туширмади ва максимал равишда ҳаракат қилишди. Бу уларнинг ғалабаси. 

Сўнгги пайтларда Ўзбекистонда футболга бўлган эътибор тасаввур қилиб бўлмайдиган даражада юқори. Мамлакатимиздагилар футболни жуда ҳам севишади, футбол билан яшашади. Бунга мисол қилиб айтиш мумкинки, Президентимиз катта ўйинларни стадиондан кўриб борадилар, биздан яхши натижа кутадилар. Бу эса ёш йигитларимизга катта мотивация бўлади. Ҳали олдимизда икки ўйин турибди, уни ғалаба билан якунлашимиз керак. Кейин эса йигитлар жаҳон чемпионатида ўзларини кўрсатишлари керак. Мақсад - йигитларни миллий терма даражасига олиб чиқиш. Бу эса йигитларга натижа ва катта иштиёқ тақдим қилади.