Жамол Белмади: "Танаффусда амалга оширилган тактик ўзгаришлар ўз мевасини берди"

- Жамоамиз учун жуда қийин учрашув бўлди. Биз Тошкентдан 3 очко билан қайтишга ишонгандик. Якунда ҳам бунга эришдик. Тўғри, биринчи бўлим биз истагандек ўтмади. Яъни ўйин бобида "Локо" биздан кўра кучлироқ кўринганди. Аммо танаффусдан сўнг амалга оширилган ўзгаришлардан кейин ўйинимиз тубдан ўзгарди. Ташаббус тўличлигича бизнинг қўлимизга ўтди. Тактик ўзгаришлар натижасида биз ўйин тизгинини қўлга олдик. Иккинчи бўлимдаги ўйинимиз орқали ғалабага лойиқ футбол кўрсатдик, деб ўйлайман.
Биз кейинги босқичга чиқдик, аммо бу дегани ОЧЛ гуруҳ босқичидаги миссиямиз ўз ниҳоясига етганини англатмайди. Вазифамиз гуруҳда пешқадамликни сақлаб қолиш. Кейинги бўлажак икки учрашувда таркиб буткул ўзгармайди. Тўғри, баъзи етакчиларга ҳордиқ чиқариш учун имконият тақдим этамиз. Ўйин амалиётисиз қолиб кетаётган футболчилар учун йўл очилади. Аммо келаси икки ўйинга беэътибор қарашга ҳаққимиз йўқ. Шу боисдан ҳам таркибда кескин ўгаришлар кузатилмайди, - деди "Ал Дуҳаил" бош мураббийи Жамол Белмади.

Шу ўринда "Локомотив" - "Ал Дуҳаил" учрашувининг энг яхши футболчиси деб топилган меҳмонлар ҳужумчиси Ал Араби ҳам матбуот анжуманида иштирок этди ва ўз фикрлари билан ўртоқлашди:

- Ғалаба қозонганимиздан бениҳоят хурсандман. Кетма-кет тўртинчи ўйинда ютиш бу жуда ёқимли. Мураббийимизнинг танаффусдаги тактик ўзгариши бизни иккинчи бўлимда бизни ўйғотди. Мен жамоам ғалабасидан кўпроқ хурсандман. Гол уриш эса мени вазифам. Буни уддалаганим ҳам албатта кишига яхши кайфият тақдим этади. Жамоамиз жорий мавсумда ОЧЛни анча муваффақиятли ўтказмоқда. Биз гуруҳдан чиқиш вазифасини уддалаганимиздан хурсандмиз.