Жаҳон чемпионати-2018 учинчи саралаш босқичига 12 апрелда қуръа ташланади

Қуръа маъросими 2016 йилнинг 12 апрель санасида, Малайзия пойтахти Куала-Лумпур шаҳрида бўлиб ўтади.

Унда иккинчи саралаш босқичидан ўтган ўн икки терма жамоа олтитадан икки гуруҳга ажратилади. Гуруҳларда биринчи ва иккинчи ўринларни қўлга киритган тўрт жамоа Жаҳон чемпионати йўлланмасини қўлга киритади. Учинчи ўрин соҳиблари эса ўзаро ўйин ўтказиб, ғолиб жамоа ФИФА қарорига кўра бошқа конфедерация вакилига қарши саралашнинг сўнгги учрашувини ўтказади.

Таъкидлаш керакки, Ўзбекистон миллий терма жамоасининг Жаҳон чемпионати-2018, иккинчи саралаш босқичи доирасидаги сўнгги икки ўйинни Тошкентдаги “Бунёдкор” стадионида ўтказади.

Ўзбекистон миллий терма жамоасининг 24 март куни бўлиб ўтадиган Филиппинга қарши учрашуви ҳам, Баҳрайнга қарши 29 март куни бўладиган ўйин ҳам 18:00да старт олади.

Эслатиб ўтамиз, сўнгги икки ўйин олдидан Ўзбекистон терма жамоаси олти учрашув ўтказиб, 15 очко тўплаган ҳолда гуруҳда иккинчи ўринни эгаллаб турибди. Гуруҳда ҳозирча 7 учрашувда 16 очко жамғарган КХДР терма жамоаси пешқадамлик қилмоқда.