Ихтиёр Ропиев: "Қозоғистон билан иккинчи ўйинда ҳақиқий ирода кўрсатдик"
16 дек 2021 08:40
Янгиликлар

Ихтиёр Ропиев: "Қозоғистон билан иккинчи ўйинда ҳақиқий ирода кўрсатдик"

Баҳодир Аҳмедов мураббийлигидаги Ўзбекистон футзал терма жамоаси кеча меҳмонда Қозоғистонга қарши иккинчи ўртоқлик учрашувида иштирок этди.

Дастлаб ҳисобда 0:3 ҳисобида ортда бораётган вакилларимиз, баҳс якунида 6:4 ҳисобида ғалаба қозонди. Терма жамоамизнинг голларидан бирига Ихтиёр Ропиев муаллифлик қилди. Биз эса мазкур беллашувдан сўнг унинг фикрлари ва таассуротлари билан қизиқдик.

"Бу жаҳон чемпионатидан кейинги илк йиғинимиз ҳисобланарди. Умумий таассуротлар яхши. Илк ўйинда омадимиз келмади. Вазиятлардан фойдалана олганимиз йўқ. Навбатдаги баҳсда эса характер кўрсата олдик. Рақибимиз жиддий жамоа. Улар Жаҳон чемпионатида кучли тўртликдан ўрин олишди. Бундай ўйинлар доим фойдали бўлади. Бизни қўллаб-қувватлаган мухлисларга раҳмат айтиб қоламан", - дейди Ихтиёр Ропиев.

- Учрашувга мезбонлик қилган "Жаксилик Ушкемпиров" аренаси ҳақида нима дея оласиз? Паркет сифати терма жамоамиз ўз ўйинини кўрсатишига қанчалик таъсир қилди?

- Нур-Султондаги аренадаги биринчи беллашувда ўз ўйинимизни топа олганимиз йўқ. Паркет бироз сирпанчиқ. Шунинг ҳисобига кўп хатоларга йўл қўйдик. Иккинчи ўйинга эса ўзимизни бунга тайёрладик. Кўрганингиздек ўйин бошқача кечди.

- Рақиб томонга прессинг қўллашда бироз секинроқ ҳаракат қилинди. Бу борада мураббийлар штаби қандай кўрсатмаларни беришди?

- Ҳисоб тенглашгунча прессинг ташкил қилдик. Мураббийлар танаффусда шошмасликни, прессингни тўғри уюштиришимизни айтишди. Амалда бу ғалабамизни таъминлади.

Абдулазиз Искандаров ёзиб олди

Ҳавола :

Манба : championat.asia

Янгиликларни Телеграмда ўқинг!

Рейтинг: +5