Ислом Исмоилов Зоминдаги ғалабадан кейин: "Жамоанинг етакчи футболчиларига жиддий эътирозим бор"

"Бугунги ўйин ҳақида гапирадиган бўлсам, тўғри ғалаба қозондик, лекин бундай ғалаба менга керак эмас. Бугунги ўйин учун жамоамизнинг етакчи футболчиларига жиддий эътирозим бор. Бу ўйинни албатта таҳлил қиламиз, нафақат етакчи, бошқа футболчиларимизга ҳам эътирозларим етарлича. Сабаби ўйинга тайёргарлик давомида футболчиларга ҳужумкор ўйин намойиш этиш ҳақида кўрсатма берамиз. Лекин йигитлар биз истаган кўрсатмаларни бажармаяпти ёки бажара олмаяпти. Тўғрисини айтганда, бугунги ўйиндан қониқиш ҳосил қилмадим.

Ҳакамлар ишини баҳолайдиган махсус қўмита бор, уларни ишига баҳо бериш бизнинг вазифамиз эмас. Ўйин давомида мураббийда вазиятдан келиб чиқиб ҳаяжон бўлади, бу табиий хол.

Такрор айтаман, биз тайёргарлик жараёнида футболчиларга фақат ҳужумкор ўйин намойиш этишлари бўйича кўрсатмалар берамиз. Машғулотларимиз ҳам ҳужумкор услубдаги футбол намойиш этишга мўлжалланган. Балки руҳият билан боғлиқдир, ёки бошқа сабаби бордир, футболчилар майдонда бизнинг кўрсатмаларимизни тўлиқ бажара олишмаяпти.

Шу ўринда сифатли майдон учун ва бу ерда олиб борилган бунёдкорлик ишлари учун "Зомин" клуби раҳбариятига миннатдорчилик билдирган бўлардим. Бугун "Зомин" мағлубиятга лойиқ ўйин намойиш этмади" - дейди Исломбек Исмоилов.