"Интер" рекорд даражада даромад қилди. Клуб 15 йил ичида биринчи марта фойдага кирди

"Интер" клуби акциядорлари ўтган молиявий йил учун ҳисоботни маъқуллади. Якуний фойда 35,4 миллион еврони ташкил этди, ўтган йили 35,7 миллион евро зарар қайд этилганди. Клуб 15 йил ичида биринчи марта йилни фойда билан якунлаганини таъкидлаш лозим.

Даромад эса "Интер" учун рекорд даражада 567 миллион еврога етди, бу ўтган мавсумга нисбатан 94 миллион еврога кўп. Бу трансферларни ҳисобга олмаганда Серия А рекордидир. Бундай натижага миллий ва Европа мусобақаларида, шунингдек, клублар ўртасидаги жаҳон чемпионатида иштирок этишдан келган маблағларнинг ўсиши туфайли эришилди.

Шунингдек, ҳомийлик шартномалари ва ўйин кунги даромадлари ҳисобига тижорат даромадларининг ўсиши қайд этилди. Харажатлар 3,8 фоизга (тахминан 18 миллион евро) ошиб, жами 482 миллион еврога етди.