Илҳом Мўминжонов: "Абдунабиев ўзини кўрсата олди. Муҳим очколарни жамғаришда давом этамиз"

"Бугунги ғалаба билан мухлисларимизни ва раҳбариятни табриклайман. Футболчилар майдонда бор кучини беришди. Бор маҳоратини кўрсатган ҳолда юракдан меҳнат қилишди", – дейди Илҳом Мўминжонов.

- Руслан Розиев ва Улуғбек Ҳошимов ўйин қайдномасидан жой олмагани нима билан боғлиқ?

- Ҳошимов ва Розиев ёшлар терма жамоаси аъзолари ҳисобланади. Айни пайтда улар ўқув-йиғин машғулотини ўтказишмоқда. Қолаверса яқинда халқаро турнирда иштирок этишади. Уларнинг йўқлиги қайсидир маънода билинди, десак ҳам бўлади. Лекин ҳозирги кунда захирамиз яхши футболчилардан иборат. Иззат Абдуллаев, Сардор Абдунабиев. Айниқса Сардор бугун ўзини кўрсата олди. Кейинги ўйинга қадар Розиев ва Ҳошимов сафимизга қайтади. 

- Сардор Абдунабиев кетма-кет голлар ураётганида захирага олинди...

- У ёш футболчиларимиздан бири. Шу вақтга қадар голлар уриб келаётганди. Кубокда "Хоразм" дарвозасини ишғол қилди. Унинг маҳорати ва салоҳиятини биламиз. Захирага олингани сабаби бошқа футболчиларга имконият беришга қарор қилдик. Захирадан майдонга тушган футболчилар берилган вақтдан унумли фойдалана олишмади. Кейинги учрашув "Бухоро"га қарши кечади. Жиддий тайёргарлик кўрамиз. У ерда ҳам яхши жамоа шаклланган. 

- Захирадан майдонга тушган футболчиларда фаоллик кўзга ташланмади. Яъни ўйин амалиёти камлиги сезилиб қолди...

- Ўйиндаги ҳисоб ҳам бунда рол ўйнади, деб ўйлайман. Ўзим ҳам вақтида футболчи бўлганман. Ҳисоб жуда йирик кўриниш олган пайтда тушишгани учун хотиржамликка берилишди. Хатога йўл қўйишди. Ўйин амалиёти камлиги таъсир қилмаслиги керак. Баҳс темпи уларни тўхтатиб қўйди. Муҳим очколарни жамғаришда давом этамиз.