Ҳамид Деракшан: "Бизда "Бунёдкор" ҳақида барча маълумотлар бор"

"Барчага Ассалому алайкум. Умид қиламизки эртага яхши ўйин ўтказамиз. Бизда "Бунёдкор" жамоаси ҳақида кўп маълумотлар бор, жуда яхши ва кучли жамоа. Сўнгги бор Дубайда ўртоқлик учрашувини ўтказгандик. Лекин бугунги таркиб ўша пайтдаги таркибдан анчагина ўзгарган. Яхши натижага эришишга умид қиламиз", - дейди Ҳамид Деракшан.

- Эртага жамоа ўз ўйинини кўрсатадими ёки сафарда бўлгани туфайли "Бунёдкор"га қараб ўйнайдими?
- Албатта биз рақибнинг олдинги ўйинларини таҳлил қилиш натижасида ўйин олиб бормоқчимиз. Асосий мақсадимиз ғалаба қозониш.

Эронлик журналист савол: - "Персеполис" 1-турда яхши ўйин кўрсатганди. Эртага ҳам яхши ўйин кўрамизми?
- Биз бутун кучимизни ишга солиб ўйин кўрсатмоқчимиз. Яна бир бор қайтараман, мақсадимиз - ғалаба.

- Таркибда йўқотишлар борми?
- Жамоада фақат икки нафар футболчи жароҳат олган ва Эронда қолган.

- Жамоа олдига ОЧЛда қандай мақсад қўйилган?
- Дастлабки турда кучли рақибни 3:0 ҳисобида мағлуб этдик. Биринчи қадамни жуда яхши қўйдик.

- Бразилиялик футболчи Тадеу ҳам жароҳат олганми? У Тошкентга келганми?
- Йўқ унда жароҳат йўқ. У жамоа билан бирга Тошкентга етиб келган.

- "Персеполис"нинг кейинги йил ОЧЛга чиқиш имкони жуда паст. Жамоа асосий эътиборни Эрон чемпионатига қаратадими ёки ОЧЛгами?
- Биз имкон қадар яхши ўйнашга уринамиз. Осиё чемпионлар лигасини яхши бошладик, ички чемпионатда ҳам юқори ўринлар учун курашамиз.

- "Персеполис" жамоаси Эронда анчагина таниқли, нима деб ўйлайсиз унинг Ўзбекистонда ҳам мухлислари борми?
- Ўзбекистонда ҳам кўплаб эронликлар яшашади. Агар эртага улар келиб бизга мухлислик қилишса хурсанд бўлардик.

- Эрон клублари Осиё миқиёсида кучсиз. Эрон терма жамоаси бош мураббийи Карлос Кейруш "Персеполис" клуби билан қандай алоқаларни ўрнатган?
- Ундай демаган бўлардим. Сабаби ОЧЛда ўйнаётган клубларнинг бир қатор футболчилари терма жамоада ўйнайди. Эрон терма жамоаси мураббийи бизнинг клуб билан доимий алоқада.


Нарзулла Сайдуллаев