Ҳамид Актамов: “Натижадан кўнглим тўлмади”

—Тақвимга кўра, бу йилги мавсум жамоамиз аъзолари учун бир мунча мураккаб бошланишини аввалдан билардик, — дейди Ҳамид Ғуломович. — Чемпионатни сафарда амалдаги мамлакат чемпиони ва Ўзбекистон кубоги соҳиби “Бунёдкор”га қарши бошлаш, ўз майдонимизда битта учрашув ўтказиб, сўнгра кетма-кет икки ўйинни сафарда “Пахтакор” ва “Нефтчи”га қарши ўтказиш осон эмас, албатта.

—Шунга қарамай, биз бу мураккабликларга йигитларимизни тайёрлай олганимиздан хурсандман. Фарғонага фақат ғалаба иштиёқида ташриф буюргандик. Афсуски, футбол майдони ҳолатининг яхши эмаслиги ўзимиз кутган ўйинни намойиш қилишимизга йўл бермади. Жамоамиз таркибида бугун Элдор Бойматовнинг майдонга тушмаганлиги ҳам сезилди.

—Умуман олганда, жамоамиз аъзоларининг ўйинидан кўнглим тўлди. Бироқ натижадан қониқмадим. Тўғри, ҳакамлар ишига баҳо бермоқчи эмасману, аммо айрим вазиятларда уларга бироз холислик етишмагандек кўринди.

—Ўз навбатида “Нефтчи” мухлисларининг фаолликларига ҳавасим келди. Қолаверса, бизни қўллаб-қувватлаш учун узоқ Навоийдан водийга ташриф буюрган мухлисларимизга ҳам миннатдорчилик билдираман. Кейинги учрашувларда уларни ўзимизнинг чиройли ўйинимиз ва ғалабаларимиз билан хурсанд қилишга ҳаракат қиламиз, албатта.