Гвардиола Де Брюйненинг хайрлашув ўйини ҳақида: "Кевин сотиб олиб бўлмайдиган чексиз муҳаббатга эришди"
22 май 12:15
Янгиликлар

Гвардиола Де Брюйненинг хайрлашув ўйини ҳақида: "Кевин сотиб олиб бўлмайдиган чексиз муҳаббатга эришди"

"Манчестер Сити" бош мураббийи Хосеп Гвардиола ярим ҳимоячи Кевин Де Брюйненинг АПЛ 37-туридан ўрин олган "Борнмут"га қарши (3:1) уй учрашуви ҳақида фикр билдирди.

Учрашув бельгиялик футболчининг "Этихад"даги ўзига хос лаҳзаси бўлди.

"Сотиб олиб бўлмайдиган нарсалар бор. Кевин йиллар давомида клуб учун қилган ишлари туфайли чексиз муҳаббатга эришди. Бу унинг куни эди ва биз у учун ғалаба қозонишни истадик. Атиги бир неча кун олдин у Англия Кубоги финалида 100 дақиқа ўйнаганди – бу осон эмас. Афсуски, у ажойиб имкониятдан фойдалана олмади, акс ҳолда жуда гўзал бўларди", – деди Гвардиола.

33 ёшли ярим ҳимоячи 2015 йилдан буён "Манчестер Сити"да тўп тепади. 9 йил ичида у "шаҳарликлар" билан 6 марта АПЛда ғолиб чиқди, 2 марта Англия кубоги, 5 марта Англия Лига Кубогида зафар қучди, 3 бор Суперкубокни қўлга киритди, шунингдек, Чемпионлар Лигаси, УEФА Суперкубоги ва ФИФА клублар ўртасидаги ЖЧда тенгсиз деб топилди.

Финал ҳуштаги янграгач, Кевин "Этихад" трибуналари билан хайрлашиб, бутун стадион олқишига сазовор бўлди.

Ҳавола :

Манба : Sky Sports

Янгиликларни Телеграмда ўқинг!

Рейтинг: +3