Tarixda ilk marta musobaqa formati kengaytirilib, 48 terma jamoani o'zida jamlaydi va umumiy hisobda 104 ta uchrashuv o'tkazilishini taminlaydi. 11 iyundan 19 iyulga qadar davom etadigan olti haftalik mega-turnir Shimoliy Amerikaning uchta yirik davlati – Amerika Qo'shma Shtatlari, Kanada va Meksika tomonidan birgalikda qabul qilinadi. Yangi format doirasida qo'shimcha sifatida 32 jamoadan iborat pley-off bosqichi ham kiritilgan bo'lib, bu o'z navbatida stadionlarning uzluksiz ishlash qobiliyati va chidamliligiga qo'yiladigan talablarni keskin oshiradi.
Mazkur sport tadbirini yuqori darajada tashkil etish va milliardlab teletomoshabinlarga sifatli translyatsiyalarni etkazib berish uchun 16 ta zamonaviy va texnologik jihatdan mukammal stadionlar tanlab olindi. Bu inshootlar nafaqat tomoshabinlar sig'imi va memoriy mahobati bilan, balki ekologik barqarorlik, murakkab agronomik injiniring va logistik qulaylik nuqtayi nazaridan ham jahon standartlarini yangilamoqda.
AQSH turnirga 11 ta stadion bilan asosiy mezbon sifatida ishtirok etsa, Meksika 3 ta va Kanada 2 ta stadionni taqdim etadi.
Tanlangan stadionlarning aksariyati ko'p tarmoqli ulkan sport inshootlari bo'lib, ular muntazam ravishda Amerika futboli milliy ligasi (NFL), Amerika Oliy ligasi (MLS) yoki mahalliy beysbol (MLB) o'yinlarini qabul qiladi. FIFAning "toza stadion" (clean venue) qoidalariga va qatiy tijoriy cheklovlariga muvofiq, ushbu stadionlarning barchasi homiylik nomlarini vaqtinchalik o'zgartirishi shart. Shuningdek, musobaqa kunlari bazi stadionlarning joylashuvi mahalliy beysbol va Kanada futboli ligalari jadvaliga bevosita ta’sir ko'rsatadi. Masalan, Dallas, Kanzas-Siti, Filadelfiya va Sietldagi stadionlar yirik beysbol inshootlariga yonma-yon joylashgan bo'lib, bu "Texas Rangers", "Kansas City Royals", "Philadelphia Phillies" va "Seattle Mariners" jamoalarining taqvimlarida logistik to'qnashuvlarni keltirib chiqaradi.
AQSH stadionlari
Amerika Qo'shma Shtatlari musobaqaning eng ko'p o'yinlarini va eng yirik sig'imli stadionlarini taqdim etadi. Mamlakatdagi 11 ta arena o'zining muhandislik echimlari, xavfsizlik tizimlari va tomoshabinlar uchun yaratilgan qulayliklari bilan dunyoda yetakchi o'rinlarni egallaydi. Ushbu stadionlarning aksariyati so'nggi yigirma yil ichida qurilgan yoki kapital ta'mirdan chiqarilgan bo'lib, ularning har biri o'ziga xos memoriy va texnologik xususiyatlarga ega.
Dallas Stadium (AT&T Stadium): Texas shtatining Arlington shahrida qad rostlagan ushbu stadion 94,000 tomoshabinni o'z ichiga oladi va bu ko'rsatkich bo'yicha musobaqadagi eng yirik inshoot hisoblanadi. Odatda NFL'ning "Dallas Cowboys" jamoasiga xizmat qiluvchi ushbu stadion yopiq turdagi inshoot bo'lib, harakatlanuvchi ulkan tom va ichki iqlimni nazorat qilish tizimiga ega. Bu tizim Texasning jazirama yozgi issig'ida futbolchilar va muxlislar uchun mo'tadil sharoit yaratishda muhim ahamiyatga ega. Dallas musobaqa davomida eng ko'p – jami 9 ta uchrashuvni, jumladan guruh bosqichining beshta o'yinini, ikkita 1/16 final, bitta 1/8 final va bitta yarim final bahslarini qabul qiladi. Angliya terma jamoasi 17 iyun kuni Xorvatiyaga qarshi o'z yurishini aynan shu yerda boshlaydi.
New York New Jersey Stadium (MetLife Stadium): Ist-Rezerford shahrida joylashgan ushbu gigant arena 82,500 tomoshabinni sig'dira oladi. Mazkur stadionning turnirdagi ahamiyati beqiyos, chunki aynan shu yerda 2026 yil 19 iyul kuni Jahon chempionatining hal qiluvchi final uchrashuvi bo'lib o'tadi. Bir vaqtning o'zida NFL'ning ikkita yirik jamoasiga xizmat ko'rsatishga moslashgan ushbu stadion jami 8 ta o'yinni qabul qiladi. Ular orasida 13 iyun kuni Braziliya va Marokash, shuningdek, 27 iyun kuni Angliya va Panama o'rtasidagi guruh o'yinlari alohida e'tiborga molik. Ekologik nuqtayi nazardan stadion tomida 1,350 ta quyosh panellaridan tashkil topgan "Quyosh halqasi" mavjud bo'lib, u binoning markaziy energiya tizimini qisman mustaqil ravishda elektr bilan taminlaydi.
Atlanta Stadium (Mercedes-Benz Stadium): Jorjiya shtatining Atlanta shahrida joylashgan mazkur stadion (sig'imi 75,000) ekologik barqarorlik va innovacion dizayn bo'yicha dunyodagi eng ilg'or inshootlardan biridir. 2017 yilda foydalanishga topshirilgan mazkur arena Shimoliy Amerika professional sport tarixida birinchi bo'lib nufuzli LEED Platinum ekologik sertifikatini qo'lga kiritgan. Stadionning eng ko'zga ko'ringan xususiyati uning sakkizta uchburchak paneldan iborat, kamera diafragmasi singari ochilib-yopiluvchi kinetik tomidir. Bundan tashqari, stadion konstrukciyasida 4,000 dan ortiq quyosh panellari o'rnatilgan bo'lib, ular ilg'or energiya tejamkorligi tizimlari bilan parallel ishlaydi. Atlanta turnir davomida jami 8 ta uchrashuvni qabul qiladi. Jumladan, O'zbekistonning Kongo Demokratik Respublikasiga qarshi 3-tur bellashuvi mazkur stadionda bo'lib o'tadi.
Los Angeles Stadium (SoFi Stadium): Kaliforniyaning Inglvud hududida qad rostlagan ushbu stadion musobaqadagi eng zamonaviy, eng yangi (2020 yil sentyabrda ochilgan) va qurilish qiymati bo'yicha eng qimmatbaho inshoot hisoblanadi. Uning sig'imi 70,000 tomoshabinga mo'ljallangan. Mazkur stadionning tarixiy ahamiyati shundaki, Amerika Qo'shma Shtatlari milliy terma jamoasi turnirdagi ochilish o'yinini 12 iyun kuni aynan shu yerda Paragvayga qarshi o'tkazadi. Stadionning yarim shaffof ETFE tomi va ochiq yon tomonlari tabiiy shamol aylanishini taminlaydi, biroq maydonning quyosh nurlaridan to'siqligi agronomlar oldida katta muammolarni yuzaga keltirdi. FIFA talablariga muvofiq kenglikni taminlash uchun stadionning burchak qismlaridagi 400 ga yaqin statik o'rindiqlar demontaj qilindi.
Boston Stadium (Gillette Stadium): Massachusets shtatining Foksboro shahrida joylashgan ushbu stadion 65,000 tomoshabinni qabul qilish imkoniyatiga ega. "New England Patriots" jamoasining uy arenasi hisoblangan Boston stadioni jami 7 ta o'yinni, jumladan chorak final bahsini qabul qiladi. Ushbu mintaqa Britaniya jamoalari muxlislari uchun asosiy logistik va madaniy markazga aylanishi kutilmoqda, chunki Shotlandiya terma jamoasi o'zining dastlabki ikkita o'yinini, Angliya esa Ganaga qarshi ikkinchi guruh o'yinini shu yerda o'tkazadi. Joriy musobaqa uchun stadion qariyb 20 yillik tanaffusdan so'ng yana tabiiy chim qoplamasiga qaytmoqda.
Philadelphia Stadium (Lincoln Financial Field): Filadelfiya shahrida joylashgan, 69,000 tomoshabin sig'imiga ega mazkur inshoot ekologik mustaqilligi va qayta tiklanadigan energiyadan foydalanish ko'rsatkichlari bilan musobaqaning eng "yashil" stadionlaridan biridir. "Philadelphia Eagles" jamoasining uy arenasi bo'lgan ushbu stadion hududida va avtoturargohlarida 11,000 dan ortiq quyosh panellari va bino tomida 14 ta mikro shamol turbinalari o'rnatilgan. Ushbu integraciyalashgan tizim stadionning bir yillik elektr energiyasiga bo'lgan ehtiyojini 100 foizgacha qayta tiklanadigan energiya hisobidan qoplash imkonini beradi. Filadelfiyada musobaqaning 6 ta o'yini o'tkaziladi, jumladan, Braziliya va Fransiya kabi jahon chempionlari, shuningdek 2018 yilgi finalchi Xorvatiya terma jamoasi shu stadionda maydonga tushadi.
Houston Stadium (NRG Stadium): 72,000 tomoshabin sig'imiga ega, iqlim nazorati va harakatlanuvchi tomga ega stadion. Mazkur inshoot har yili 2.6 million mehmon tashrif buyuradigan Xyuston rodeosiga mezbonlik qilishi bilan ham tanilgan. Turnir davomida u 7 ta o'yinni, jumladan musobaqa debyutantlari Kyurasao va O'zbekiston terma jamoalarining o'yinlarini qabul qiladi (O'zbekiston Portugaliyaga qarshi aynan shu yerda o'ynaydi).
Kansas City Stadium (Arrowhead Stadium): 73,000 sig'imga ega bo'lib, 1972 yilda qurilgan va 2010 yilda kapital ta'mirlangan. Amaldagi jahon chempioni Argentina o'z unvonini himoya qilish yurishini 16 iyun kuni mazkur stadionda Jazoirga qarshi boshlaydi. Bu yerda jami 6 ta o'yin, jumladan chorak final bo'lib o'tadi.
San Francisco Bay Area (Levi's Stadium): Sig'imi 71,000 kishilik bo'lib, 2014 yilda ochilgan. Bu inshoot LEED Gold sertifikatiga ega va uning tomida yiliga 10,000 funt (qariyb 4.5 tonna) qishloq xo'jaligi ekinlari yetishtiriladigan noyob "yashil bog'", shuningdek piyodalar ko'prigida quyosh panellari joylashgan. Ushbu stadion AQSH terma jamoasining pley-offdagi ehtimoliy birinchi o'yiniga mezbonlik qilishi mumkin.
Seattle Stadium (Lumen Field): 69,000 sig'imga ega bo'lgan arena AQSHning shimoli-g'arbiy mintaqasidagi asosiy futbol markazi sanaladi. 19 iyun kuni AQSH terma jamoasi guruh bosqichida Avstraliyani aynan shu yerda qabul qiladi.
Miami Stadium (Hard Rock Stadium): 65,000 tomoshabinni sig'diruvchi va 1987 yilda qurilgan bu inshoot Florida yarimorolidagi futbol markazlaridan biri hisoblanadi. Turnir davomida inshoot muhim qarama-qarshiliklarni, xususan 24 iyun kuni Shotlandiya va Braziliya, 27 iyun kuni esa Portugaliya va Kolumbiya bahslarini qabul qiladi. Eng muhimi, 18 iyul kuni musobaqaning uchinchi o'rini uchun bo'lib o'tadigan bahs ham aynan Mayamida o'tkaziladi.
Meksika stadionlari
Meksika Jahon chempionati tarixida misli ko'rilmagan rekord o'rnatmoqda: u erkaklar o'rtasidagi mundial o'yinlarini uchinchi marta (1970 va 1986 yillardan so'ng) qabul qilayotgan ilk davlatga aylandi. Bu mamlakatning futbolga bo'lgan ishtiyoqi nafaqat muxlislar armiyasida, balki taqdim etilayotgan stadionlarning tarixiy hamda zamonaviy qiymatida ham o'z aksini topadi.
Mexico City Stadium (Estadio Azteca): Dunyo futbolining eng muqaddas va afsonaviy maskanlaridan biri bo'lgan, xalq orasida "Coloso de Santa Úrsula" deb ataluvchi "Acteka" stadioni 83,000 (bazi manbalarda 87,000 gacha) tomoshabin sig'imiga ega va Markaziy mintaqada joylashgan. 1962–1967 yillarda taniqli memor Pedro Ramires Vaskes loyihasi asosida qurilgan ushbu gigant inshoot Pele va Maradona kabi afsonalarning triumfiga guvoh bo'lgan. 2026 yilgi turnir ochilishi uchun mazkur stadion 2024–2026 yillar oralig'ida keng ko'lamli rekonstrukciyadan chiqarilmoqda. Tarixiy ahamiyatga molik voqea shundaki, 2026 yilning 11 iyun kuni musobaqaning ilk ochilish uchrashuvida Meksika milliy terma jamoasi Janubiy Afrikaga qarshi aynan shu maydonda maydonga tushadi. Natijada "Acteka" tarixda uch xil Jahon chempionatining ochilish o'yinini qabul qilgan dunyodagi yagona stadion maqomini mustahkamlaydi. O'zbekiston milliy terma jamoasi Kolumbiyaga qarshi mundialdagi tarixiy yurishini aynan shu tarixiy o'yingohda boshlaydi.
Estadio Monterrey (Estadio BBVA): Monterrey shahridagi stadion nisbatan yangi bo'lib, 2011–2015 yillarda 200 million AQSH dollari evaziga qurilgan va 53,500 tomoshabin sig'imiga ega. Mashhur Populous arxitektura byurosi tomonidan loyihalashtirilgan bu stadion o'zining futuristik dizayni va tashqi fasadida po'lat materiallardan keng foydalanilganligi sababli mahalliy aholi tomonidan "El Gigante de Acero" (Po'lat Gigant) deb ataladi. Stadionning eng hayratlanarli jihatlaridan biri uning tabiat bilan uyg'unligidir – tribunalarning ochiq tomonidan Serro-de-la-Silya tog' tizmalarining muhtasham manzarasi ko'rinib turadi.
Estadio Guadalajara (Estadio Akron): Sapopan shahrida (Gvadalaxara mintaqasi) joylashgan mazkur stadion 48,000 tomoshabinga mo'ljallangan. 2010 yilda foydalanishga topshirilgan mazkur inshoot Meksikaning eng mashhur klublaridan biri "Chivas"ning uy arenasi hisoblanadi. Uning memoriy echimi jahonda kamdan-kam uchraydigan yondashuvga asoslangan: stadion tashqi ko'rinishidan faol bo'lmagan vulqpnni eslatadi va atrof-muhit landshaftiga, yashil tepaliklarga singib ketgandek taassurot uyg'otadi. Diqqatga sazovor jihati shundaki, "Akron" stadioni butun musobaqa davomida faqat guruh bosqichidagi 4 ta o'yinni qabul qiladi va pley-off bosqichi bahslari o'tkazilmaydigan 16 ta stadion ichidagi yagona inshoot hisoblanadi.
Kanada stadionlari
Kanada davlati tarixda birinchi marta erkaklar o'rtasidagi Jahon chempionatiga mezbonlik qilmoqda. Ushbu ulkan vazifani bajarish uchun mamlakatning ikkita yirik megapolisi – Vankuver va Toronto tanlab olingan.
BC Place Vancouver: Vankuver shahri markazida joylashgan ushbu stadion 54,000 tomoshabinni qabul qila oladi. 1983 yilda qurilgan va so'nggi bor 2010 yilgi Qishki Olimpiya o'yinlaridan so'ng kapital ta'mirlangan mazkur inshoot dunyodagi eng yirik kabel orqali tortilgan harakatlanuvchi tomga ega arxitekturaviy yodgorlik sanaladi. Inshoot turnir davomida 7 ta uchrashuvni, jumladan Kanada milliy terma jamoasining guruh bosqichidagi so'nggi ikkita o'yinini hamda 1/16 va 1/8 final bahslarini qabul qiladi. Britaniya Kolumbiyasi hukumati va federal byudjet tomonidan ajratilgan 100 million dollarlik sarmoya evaziga stadion ichida keng ko'lamli yangilanishlar amalga oshirildi.
Toronto Stadium (BMO Field): Toronto shahridagi mashhur "BMO Field" stadioni turnirdagi eng kichik sig'imga ega inshootdir (rasmiy sig'imi 45,000 tomoshabin). Odatda "Toronto FC" va Kanada regbi terma jamoasiga xizmat qiluvchi ushbu stadionning bazaviy sig'imi atigi 28,000 kishini tashkil etadi. FIFAning Jahon chempionati uchun minimal 40,000 dan ortiq sig'im talabini bajarish maqsadida muhandislar stadionning shimol va janub tomonlarida ulkan hajmdagi qo'shimcha 17,756 ta vaqtinchalik o'rindiqlarni o'rnatishga majbur bo'lishdi. Vaqtinchalik metall va konstrukciyalar shahar ko'rinishini buzmasligi uchun, ularning tashqi tomoni "Biz Torontomiz" (We are Toronto) yozuvi tushirilgan, turnirning o'ziga xos to'q qizil rangli ulkan FIFA bannerlari bilan qoplandi. Ilgari media va VIP mehmonlar kiradigan g'arbiy tomon esa maxsus mehmonlar uchun mo'ljallangan ulkan mehmondo'stlik chodiriga aylantirildi. Bundan tashqari, stadion yonidagi tarixiy Qirolicha Elizaveta binosi musobaqa davomida Torontoning rasmiy media-markazi sifatida xizmat qiladi. Toronto musobaqaning 6 ta o'yinini, jumladan, guruh bosqichining beshta o'yinini va bitta 1/16 final (K va L guruhlarining ikkinchi o'rin egalari o'rtasidagi) pley-off bahsini qabul qiladi.
"JCH-2026'ni Allplay'da tomosha qiling - CANNAVARO promokodi bilan 45 kun bepul"
Promokodni faollashtirish HAVOLASI
