Футзал. Ихтиёр Ропиев: “Гуруҳимиз чакки эмас”

Мундиал олдидан терма жамоамиз аъзоси Ихтиёр Ропиев билан суҳбатлашдик.

- Жаҳон чемпионатига тайёргарлигимизни яхши олиб бордик, - дея сўз бошлади Ропиев. Баҳодир Аҳмедов ва Нодир Элибоев ёрдамида машғулотларимиз кунига 2 маҳалдан олиб борилмоқда. Умуман олганда, ЎФАга ҳам миннатдорчилик билирамиз. Улар томонидан бизга барча шароитлар яратиб берилмоқда. Ўртоқлик учрашувларида ҳам Испания, Аргентина, Португалия сингари кучли терма жамоаларга қарши ўйнадик. Бу орқали ўйин амалиётимизни янада ошириб олдик.

- Ўзбекистон футзал терма жамоаси “Б” гуруҳида Гватемала, Россия ва Мирсга қарши ўтказади. Гуруҳдаги имкониятларимиз борасида нима дея оласиз?
- Гуруҳимиз чакки эмас. Бу ерда ким камроқ хато қилса, ўша томон ютади деб ўйлайман. Гватемала билан биринчи маротаба ўйнамоқдамиз. Ишонаманки, бу ўйинда ғалаба қозонишнинг уддасидан чиқа оламиз. Россия эса жаҳоннинг энг кучли терма жамоаси ҳисобланади. Уларга қарши муносиб ўйин намойиш қилмоқчимиз. Миср билан Таиландда бўлган мусобақада ўзаро ўйнаганмиз ва уларни мағлубиятга учрата олган эдик. Нима бўлса ҳам, ҳар бир рақибни ҳурмат қиламиз ва гуруҳда ижобий натижа учун майдонга чиқамиз.

- Бу галги мундиалда ким ғолиблик учун асосий фаворит?
- Менинг фикримча, Бразилия, Аргентина, Испания ва Португалия терма жамоалари ғолиблик учун асосий даъвогарлар ҳисобланади.

- Мазкур ЖЧни кўплаб скаутлар кузатишади. Турнирдан сўнг сизга хориж клубларидан таклиф тушса, буни қабул қилармидингиз?
- Бу ҳар бир футзалчининг орзуси ҳисобланади. Агар таклиф бўлса, оилам ва мураббийларим билан маслаҳатлашиб, буни ўйлаб кўрамиз.