Футзал. АГМК жамоаси аъзоларига планшет ва пул мукофоти берилди
25 авг 2019 10:24
Янгиликлар

Футзал. АГМК жамоаси аъзоларига планшет ва пул мукофоти берилди

Ўзбекистон чемпионатининг 7-тур 6-куни доирасидаги АГМК - "Бунёдкор" учрашувидан олдин клубимиз раҳбарияти Александр Петров бошчилигидаги футзал жамоамизнинг қитъа чемпионатидаги тарихий натижаси учун совғалар билан тақдирлади.

Клуб тарихида янги саҳифа очиб, Осиё чемпионатида тўртинчи ўринни қўлга киритган жамоамиз аъзоларининг ҳар бирига раҳбарият томонидан планшет ҳамда умумий жамғармаси 200 миллион бўлган пул мукофоти тақдим этилди. Совғаларни клуб бош директори Мухтор Қурбонов топширди.

Тақдирлаш маросими аввалида сўзга чиққан АГМК ПФК бош директори Мухтор Қурбонов жамоамиз намойиш этган ўйин ва натижадан кўнгил тўлгани ва мазкур мусобақа ёш футзалчиларга катта мактаб бўлганини таъкидлаб, келгусида мусобақанинг янада олий ўринлари учун курашиш кераклигини қўшимча қилди.

Қайд этиш керакки, Осиё чемпионатидан қайтиб келган футзалчиларимиз ички чемпионат ўйинларига киришишди ва тур доирасида аввалига "Навбаҳор"га 8та тўп, "Бунёдкор"га эса 13та гол уришни уддасидан чиқишди ва турнир жадвалида якка ҳокимликни ўрнатишди.