Финалда ўйнайдиган футболчиларга жиддий савол

Жамоа етилиб турганди, уларда чемпионлик учун имконият деган нарса реалроқдек эди. Вьетнамни Равшан Ҳайдаров майдонга тушса ҳам ютишимиз мумкин (бироқ майдон шундай нарсаки, унда ҳамма нарса бўлади, балки вьетнамликлар мураббийи тушганда ҳам Вьетам ютиб кетар демоқчиман). Гап бунда эмас. Гап таркибдаги футболчиларнинг келажагида, ўртоқлар.

Осиё Чемпионатида энг кўп пас берган футболчи бу Одил (Аҳмедов эмас). Мана шу Одил энг камида ўша Аҳмедовнинг ўрнини босмаса, ҳисоб эмас. Биз Аҳмедов “Арсенал”га ўтармикин деб юргандик. Бироқ у Буюк Ипак Йўли бўйича юриш қилди. Ваҳоланки Германия ва Франция клублари ҳам Одилни сўраётганди. Шунчаки Одил учун агентлар сўраган пулни Хитойда тўлай олишарди (уларда одам ҳам, пул ҳам, муаммо ҳам кўп). Нима демоқчиман, Одил-у бизнинг истагимизгина эмас, саҳна ортида пул қиладиганлар ҳам катта роль ўйнайди баъзида.

Достон Ҳамдамов бир неча йиллардан буён буксовать қилади, аммо “Бунёдкор”дан баландроққа учиши қийин барибир. Чунки “Бунёдкор” ҳам яхши клуб, арабларнинг бир нечтасидан кучлироқ. Сиз Достоннинг келажагини қаерда кўрасиз?

Азиз Ғаниевни Максим Шацких сўраб ётибди (Киевда менинг йўлимни босар шу деб ўйлаган бўлса бордир), Сиддиқовни Қўқонда қанча яхши кўришмасин, барибир у ҳам собиқ хонликда қолиб кетолмайди, тўғрими? Термага етиб кела олмаган Элдор Шомуродов бор, Отабек Шукуров бор...

Нега бу мавзуга ўтиб кетдим айтайми, чунки айнан улар истаймизми, йўқми Қатар—2022 саралашида асосий фигура бўлади. Агар улар эҳтимолий Гейнрих ёки Сергеевни такрорласа, Қатар билан ҳозирдан хайрлашиш мумкин. Планка камида Одил, Макс, Сервер, Витядир балки. Аммо унутмайлик, ҳатто улар ҳам ёрдам беролмаган вақтлар бўлди. Мана энди ҳаммамизга савол: бугуннинг йигитлари улардан ўтадими? Жавобимиз “Ҳа” бўлса, умид бор, демак, ишлаш керак (бироқ қачонгача биз улар учун жавоб берамиз). Бу саволга уларнинг ўзи жавоб берсин (“Худо хоҳласа”, “вақт кўрсатади” ёки “ҳаракат қиламан” деган вариантлар инобатга ўтмайди. “Ҳа” ёки “йўқ”, тамом).