Фарғонада янги стадион фойдаланишга топширилди

"Мамлакатимизда спортни, хусусан, болалар спортини ривожлантиришга қаратилаётган алоҳида эътибор ёшларимизнинг халқаро миқёсда улкан ютуқларни қўлга киритишида асосий омил бўлиб хизмат қилмоқда. Айниқса, футболнинг моддий-техник базасини янада мустаҳкамлаш, халқаро миқёсда Ватанимиз шарафини муносиб ҳимоя қилишга қодир футболчилар, мураббийлар ва ҳакамлар тайёрлаш борасида кўрилаётган чора-тадбирлар ўзбек футболининг жаҳонга чиқишида катта аҳамият касб этмоқда.

Ушбу йўналишдаги ишларнинг изчил давоми сифатида янгидан бунёд этилган 20 минг ўринли стадион ўзининг ноёб меъморий-муҳандислик ечими, бетакрор дизайни билан шаҳар кўркига кўрк қўшмоқда", дейилди хабарда.

Маълум қилинишича, "Истиқлол" стадиони халқаро талабларга жавоб беради ва унга замонавий ёритиш тизими ўрнатилган.

Томошабинлар жойи, майдон ҳолати ҳавас қилгулик даражада. Майдонга Голландиядан келтирилган махсус майса уруғи сепилди, натижада майдон тўрт фаслга ҳам чидамли, йил давомида кўм-кўк яшнаб турадиган майсалар билан қопланган.

Шу билан бир қаторда ОАВ ҳодимлари учун ҳам қулай шароитлар яратилган.

Хабарда айтилишича, видео табло, замонавий аудиосистема мосламалари ва бошқа ахборот-коммуникация технологиялари билан жиҳозланган шарҳловчилар хонаси ўйин пайтида мухлисларни зарур маълумотлар билан тезкор равишда хабардор этиш, мусобақаларни тўғридан-тўғри эфирга узатиш, теле ва радио трансляция сифатини таъминлашга хизмат қилади.

фото: uza.uz