Элдор Шомуродов: “Мусобақага тайёргарлик яхши кетяпти”

Кеча Равшан Ҳайдаров шогирдлари биринчи лига вакили “Оқ-тепа” билан беллашиб, 3:0 ҳисобида зафар қучишди.

Ўйиндаги дастлабки гол Элдор Шомуродов ҳисобига ёзилди. “Машъал” ҳужумчиси сайтимизга ўз фикрини билдирар экан, тайёргарлик яхши кетаётганини айтиб ўтди.

“Ҳозир бор эътиборимиз ёшлар ўртасидаги Осиё чемпионатида муносиб иштирок этишга қаратилган, - дейди сурхондарёлик футболчи. - Бунинг учун машғулотларда астойдил ишлаяпмиз. Ҳозир бизга Равшан ака Ҳайдаров мураббийлик қилмоқда. Йил бошида Алексей Евстафеев билан ишлагандик, кейин Сергей Лушан жамоани бошқарди ва эндиликда Равшан Ҳайдаров бизни Осиё чемпионатига тайёрламоқда. Евстафеев қўли остида 4-4-2 схемасида ҳаракат қилардик. Равшан ака эса бизга 4-3-3 тактикасида ўйнашимиз кераклигини айтяпти. Сергей Лушан даврида ҳам шу усулда тўп сурардик”.