Элдор Шомуродов: “Чиройли ўйин кўрсатиб мухлисларни хурсанд қиламиз”

“Мусобақани кутилганидек бошлай олмадик. Рақиб ҳимоячилари тартибли ўйин намойиш этишди. Насиб қилса, кейинги ўйинда янада яхшироқ ўйнаб, кўпроқ гол киритишга ҳаракат қиламиз", - дея сўз бошлади ҳужумчимиз.

-   Ўйин давомида сиз Сергеев билан жой алмашиб ҳаракат қилдинглар. Бу нарса Кореядек тартибли терма жамоага қарши ўйинда ҳалал бермайдими.
-   Бу нарса катта аҳамиятга эга эмас. Масалан мен ҳам, Игорь ҳам марказий ҳужумчи ролида ўйнаганмиз. Бу нарса рақиб ҳимоячиларини чалғитиш учун танланган услуб эди.

-   Мағлубиятдан сўнг, Ироққа қарши ўйин олдидан мураббийлар томонидан қандай маслаҳатлар берилди?
-   Биринчи мағлубиятдан сўнг рухан чўкиб қолмаслик уқтирилди. Ҳали имкониятимиз бор. Нима қилиб бўлса ҳам Ироққа қарши ўйинда ғалаба қозонишимиз керак. Бундан қийин вазиятларда ҳам, масалан жаҳон чемпионатида гуруҳдан чиқиш вазифасини уддалаганмиз.

-   Ироқ терма жамоасининг асосий футболчилари мамлакат миллий терма жамоасига ҳам аъзо ҳисобланадилар. Бу нарса барибир жамоанинг кучлилигидан далолат беради... Қайси футболчига кўпроқ эътибор қаратилади?
-   Жамоанинг ўйинларини, футболчиларнинг ҳаракатларини кўрдик. Жамоа ўрганиб чиқилди. Худо хоҳласа чиройли ўйин кўрсатиб мухлисларимизни хурсанд қиламиз.

Толибжон Қосимов суҳбатлашди