Диёр Имомхўжаев: "2024/25 йилги мавсумдан эътиборан ОФК квота ажратишда сўнгги 8 йиллик натижаларга эътибор қаратади"

"Ҳа, бу биз учун кам. Квоталар сонини йилдан йилга ошириб бориш эса ўзимизнинг қўлимизда. Тушунтиришга ҳаракат қиламан. 

ОФК квоталар белгилашда сўнгги 4 йиллик натижаларга эътибор қаратиб келаётганди. Бунинг натижасида биз 2023/24 йилги мавсум учун "2+2" квотасига эга чиқдик. Ҳозирги ҳолатда ғарб минтақасида Саудия Арабистони, Эрон ва Қатардан ортдамиз. 

2024/25 йилги мавсумдан эътиборан ОФК квота ажратишда сўнгги 8 йиллик натижаларга эътиборини қаратади. Оқибатда БАА ҳам биздан ўзиб кетади. Чунки тахминан 2014-17 йиллар давомида футбол клубларимиз халқаро майдонда жуда суст иштирок этган. Ҳисоблаш эса 2015 йилни ҳам назарда тутади. Пандемия сабаб 2020 йил ҳисобга киритилмайди. 

Февраль ойида "Насаф", августдан бошлаб "Навбаҳор" ва АГМК, сентябрдан бошлаб "Пахтакор" ва "Насаф" Чемпионлар Лигасида муваффақиятли иштирок этишига тилакдошмиз. Бу эса квоталаримиз сонини оширишга ёрдам бериши мумкин. Ҳозирги ҳолатда эса БАА ҳам анча илгарилаб кетган.

Ўша 2014 йиллардан бошлаб биз лицензиялаш жараёнига паст назар билан қараганмиз, футбол клубларимизни том маънода профессионал футбол клубларига айлантиришда кўзбўямачилик билан машғул бўлганмиз. "Футбол шарҳи", "Соккер клуб" каби дастурлар, "Эрудит спорт" газетасидаги мақолалар бежиз яхши кўрилмаган, чунки ўша вақтлардаги ҳолат уларда ифода этилган. Биз ҳақиқий ҳолатимизни аниқ тан олишимиз ва кейинги режаларни шунга қараб мослаштиришимиз шарт. Бироқ афсуски, бугун биз смс ёзган шахслар Аббос Файзуллаевнинг Чемпионлар Лигасида эҳтимолий Роналдуга қарши ўйнашидан кўра унинг U-20 Осиё Кубогида тўп тепишини кўпроқ истамоқда. Бу эса бизга потенциал Шомуродовларни эмас, бир неча йил йўқолиб қолиб, кейин катта қийинчилик билан оёққа турадиган Искандеровларни тақдим этиши ҳақиқатга яқинроқ. Келажак авлод биздан ранжимаслиги учун ҳам хушёрроқ бўлишимиз шарт", – дейилади Имомхўжаев ёзган постда.