Даврон Файзиев: “Элитада қолиш имкониятимиз йўқотилгани йўқ”

- Аввало бугунги ИИБ ходимларининг касб байрами билан самимий муборакбод этмоқчиман. Ўйинга келадиган бўлсак, бугун ҳар икки жамоа учун ҳам ғалаба сув ва ҳаводек зарур эди. Олий лигада қолиш учун курашаётган клубларнинг тўқнашуви бўлди дейиш мумкин. Андижонликлар учун қўшалоқ байрам бўлди – дея гап бошлади Даврон Орипович.

- Бугунги ўйин учун шогирдларимга эътироз йўқ. Ўйин бўйича ютқазмаётган бўлсакда, натижага келганда оқсаяпмиз. Аввалги турда ҳам “Насаф”ни ўз майдонимизда ютишга жуда яқин тургандик. Аммо...

- Александр Клецковнинг захирада қолаётганини боиси унинг яқинда қайнонаси оламдан ўтганди. Шу муносабат билан у маълум муддат машғулотларда иштирок эта олмади. Бугун ўз дарвозамиздан ўтказиб юборган биринчи голга келадиган бўлсак, ўша вазиятда Анвар Бердиевдек тажрибали ҳужумчининг маҳорати қўл келди. Агарда унинг ўрнида бошқа ҳужумчи бўлганида, эҳтимол гол бўлмасмиди. Ҳимоячимиз (Сардор Қаҳҳоров назарда тутилмоқда) гол бўлган вазиятда оддий хатога йўл қўйди. Тўпни дарвозабонга ўтказиб юбориши керак эди. Ёки ўзи олдинга тепиб юбориши лозим эди. Энди нима ҳам дердик. Йигитларга барибир маҳорат етишмаяпти. Кўпчилик айтадики, маҳоратли ҳимоячи билан ҳужумчи олишни. Лекин уларни қаердан топамиз?! Ҳозир бунга имконимиз йўқ. Бу гаплар баҳонадек кўриниб қолиши учун ҳам гапиришни фойдаси йўқ менимча.

- Олий лигада қолиш учун ҳамон имконият бор экан охиригача курашамиз. Олдинда учта ўйин қолди. Керакли очколарни қўлга кирита олсак, вазифани бажарамиз. Жиззахда футбол бўлган ва бундан кейин ҳам бўлади – дейди Файзиев.

Исломбек Рустамбеков