Черан "Навбаҳор" ва "Нурафшон"ни "севади"
07 ноя 2021 10:32
Янгиликлар

Черан "Навбаҳор" ва "Нурафшон"ни "севади"

"Пахтакор" "Сурхон"ни мағлуб қилган оқшомда Драган Черан ўз номини 2 бор таблога ёздириб қўйди.

Яна ҳам аниқроқ гапирсак, юртимизга 2016 йилнинг ёзида келган сербиялик футболчи Ўзбекистон чемпионатларидаги 138-ўйинида 96 ҳамда 97-голларини рақиб дарвозасига жойлаб қўйди.

Термиз клубига қарши кечган учрашувдаги дубль Драган учун Суперлигадаги 15-си бўлди (7 таси "Насаф", қолган 8 таси "Пахтакор" либосида урилган).

"Шерлар" етакчиси Наманганнинг "Навбаҳор" клубига қарши ўйнашни яхши кўради. У "Лочинлар"га қарши учрашувларда 4 бор дублни расмийлаштирган. Черандан 1 ўйинда 2 та гол ўтказиб юборган жамоалар рўйхати билан танишинг.

"Навбаҳор"	4
"Локомотив"	2
"Металлург"	2
"Нефтчи"	1
"Сўғдиёна"	1
"Пахтакор"	1
"Қизилқум"	1
"Бухоро"	1
"Бунёдкор"	1
"Сурхон"	1

Шунингдек, унинг ҳисобида Суперлига баҳсларида расмийлаштирилган 5 та хет-трик бор. 34 ёшли футболчи "Нурафшон" (2 бор), "Андижон", "Насаф" ва "Қизилқум" дарвозасига 90 дақиқа ичида 3 та гол уришни уддалаган.

Факт: Драган Суперлига доирасида тўқнаш келган барча - 19 рақибининг голкиперларини ранжитган. Унинг зарбаларидан энг кўп Бухоро вилоятининг бош жамоаси азият чеккан. "Навбаҳор" ва "Локомотив" сингари "шерлар"нинг азалий рақиблари эса кучли учликда.

"Нурафшон"	12
"Навбаҳор"	9
"Локомотив"	9
"Металлург"	9
"Қизилқум"	8
"Андижон"	6
"Машъал"	5
"Бунёдкор"	5
"Қўқон-1912"	5
"Сурхон"	5
"Сўғдиёна"	4
"Обод"	3
"Пахтакор"	3
"Нефтчи"	3
АГМК	3
"Насаф"	3
"Шўртан"	2
"Турон"	2
"Динамо"	1

Сўзимиз охирида келтирадиган маълумотимизни термизлик мухлислар ўқисин, аммо йиғлаш йўқ: Черан Суперлиганинг охирги 3 мавсумида "Сурхон"дан кўпроқ гол урди. Тамом!