Championat.Asia ва Transfermarkt Суперлиганинг март ойидаги энг яхшиларини аниқлашди
05 апр 2023 15:00
Янгиликлар

Championat.Asia ва Transfermarkt Суперлиганинг март ойидаги энг яхшиларини аниқлашди

Теглар : Transfermarkt.de

Championat.Asia ва дунёга машҳур бўлган Transfermarkt порталининг ўзаро ҳамкорлиги бу йил ҳам давом этади.

Ушбу ҳамкорлик доирасида икки сайт биргаликда ҳар ой Суперлиганинг энг яхши мураббий ва энг яхши футболчисини аниқлаб келмоқда.

Овоз бериш жараёнида Championat.Asia сайти журналистлари ҳамда Transfermarkt порталининг рус бўлими ходимлари иштирок этишди, таклиф этилган эксперт сифатида футбол шарҳловчиси Отабек Жўраев қатнашди.

Овоз бериш натижасига кўра март ойининг энг яхши мураббийи деб Виталий Левченко тан олинди. Унинг қўл остида "Нефтчи" дастлабки 3та турнинг барчасида ғолиб бўлди (ғалабалардан бири амалдаги чемпион "Пахтакор" устидан). 9 очко билан жамоа мусобақа жадвалининг энг юқорисида бормоқда. Левченкога 23 овоз берувчидан 19 нафари овоз берди (82%).

Баҳор фаслининг илк ойида Ҳусниддин Алиқулов энг яхши футболчига айланди. "Насаф" ҳимоячиси нафақат ҳимояда, балки ҳужумда ҳам ўзини кўрсатди: у иккита ўйинда жамоасига ғалаба келтирган гол муаллифига айланди! Айнан Алиқуловнинг хизматлари эвазига "Насаф" айни пайтда пешқадамдан 3 очко кам жамғарган. Унга журналистларнинг 56% овоз берди, "Навбаҳор" ҳужумчиси Темурхўжа Абдуҳолиқов ва "Пахтакор" ҳимоячиси Фарруҳ Сайфиев эса 17% овоздан олишди.