Бугун Куала-Лумпурда Малайзия – Ўзбекистон ўйини

Қитъа чемпионатида Осиёнинг 8та давлати терма жамоалари икки гуруҳга бўлинган ҳолда баҳсларга киришишади. Биз учун аҳамиятлиси, Ўзбекистон аёллар терма жамоаси ҳам ушбу тарихий қитъа чемпионатида иштирок этади.

Футзалчиларимиз “А” гуруҳдан жой олишган бўлиб, Аваз Мақсумов шогирдлари Эрон, Малайзия ва Гонконг терма жамоаларига қарши баҳс олиб боришади. Бугун терма жамоамиз гуруҳдаги илк учрашувни мезбонларга қарши ўтказади. Айнан шу баҳс Осиё чемпионатининг очилиш ўйини сифатида қайд этилади. Малайзия – Ўзбекистон учрашуви бизнинг вақт билан соат 13:30да бошланади.

Эртага Эрон, 23 сентябрь куни Гонконг терма жамоасига қарши ўйинлар белгиланган. Ҳар бир гуруҳдан иккитадан жамоа ярим финалга йўл олади. Эслатиб ўтамиз, терма жамоа футзалчиларининг аксариятини “Севинч” клуби футболчи қизлари ташкил қилади. Шунингдек, Тошентнинг “Бунёдкор”, пойтахт вилоятининг “Металлург” клубларидан ҳам футзалчилар таклиф этилган.

Маълумот сифатида айтиш мумкин, терма жамоамиз сафар олдидан Қарши ҳамда Тошкент шаҳрида ўқув-машғулот йиғинини ташкил этди. Осиё чемпионати ғолиб ва совриндорлари 26 сентябрь куни маълум бўлади.