Бугун футбол. "Навбаҳор" - "Пахтакор"

Биринчи босқични пешқадам сифатида тугатган "Пахтакор" бугун Наманганда меҳмон бўлади.

Айтиш мумкинки, бу ўйин турнинг марказий баҳси бўлади. Биринчи босқичда "Навбаҳор" ўз уйида "Пахтакор"ни 1:0 ҳисобида мағлуб этганди. Жамоа ўтган йил ҳам "Пахтакор"дан устун келган. Шота Арвеладзе ҳозирча Наманганда зафар қуча олгани йўқ.

Бугун ҳам қизиқарли беллашув кўрсак ажаб эмас. Ким ғолиб чиқишини эса олдиндан айтиш қийин. "Пахтакор" биринчи даврани 47 очко билан пешқадам сифатида тугатганди, бироқ "олтин очколар" туфайли иккинчи босқич олдидан 3-ўринга тушиб қолди. "Навбаҳор" эса аксинча биринчи ўринга кўтарилиб олган. Жамоалар орасидаги фарқ 2 очкони ташкил этяпти.

"Навбаҳор" жорий мавсум ҳали ўз уйида ютқазгани йўқ. Мўминжонов шогирдлари ҳисобида 9та ғалаба ва икки дуранг бор. Тўплар нисбати 20-2. Кўриб турганингиздек, наманганликлар уйда атиги иккита гол ўтказишган.

Биласизми? "Навбаҳор" охирги учта ғалабасини фақат уйда қўлга киритган. Бу жамоа "Бухоро", "Пахтакор" ва "Сўғдиёна"дан устун келган.

"Пахтакор" сафарда 5 марта ғалабага эришган, жамоа ҳисобида учтадан мағлубият ва дуранг бор. "Пахтакор" сафарда "Бунёдкор", "Бухоро" ва "Навбаҳор"га ютқазган.

Биласизми? "Пахтакор" сафардаги охирги икки ўйинида бир мағлубият ва дуранг қайд этган. Жамоа охирги марта 17-турда "Қизилқум"ни 2:1 ҳисобида енгиб қайтган.