Ўзбекистон футзал терма жамоаси мураббийлар штаби истеъфога чиқарилди
06 фев 19:57
Янгиликлар

Ўзбекистон футзал терма жамоаси мураббийлар штаби истеъфога чиқарилди

Бугун Ўзбекистон футзал федерацияси Ижроия қўмитасининг навбатдан ташқари йиғилиши бўлиб ўтди.

Унда Ўзбекистон миллий футзал терма жамоасининг Осиё Кубоги-2026 мусобақасидаги иштироки танқидий руҳда муҳокама қилинди.

Йиғилишда Ўзбекистон футзал федерацияси президенти Бекзод Маматқулов терма жамоанинг қитъа биринчилигидаги иштирокини баҳолар экан, мусобақага пухта тайёргарлик кўриш учун барча зарур шарт-шароитлар яратилганини таъкидлади. Хусусан, мураббийлар штаби иш режаси асосида мунтазам ўқув-машғулот йиғинлари ташкил этилгани, жамоага жаҳоннинг кучли топ-терма жамоалари спарринг рақиб сифатида жалб этилгани қайд этилди.

Шу билан бирга, Индонезияда бўлиб ўтган мусобақа давомида жамоа аъзолари ўз имкониятлари даражасидан паст иштирок этгани, футзалчиларда курашга чанқоқлик ва ғалабага бўлган иштиёқ каби муҳим жиҳатлар етарлича намоён бўлмагани танқид қилинди. Натижада терма жамоа гуруҳ босқичидан қийинчилик билан плей-оффга чиққан бўлса-да, чорак финалда олдига қўйилган вазифани бажара олмади.

Миллий терма жамоа бош мураббийи Нодир Элибоевнинг бошқа ишга ўтганлиги муносабати билан истеъфо тўғрисидаги аризаси инобатга олинди. Шунингдек, Ўзбекистон миллий футзал терма жамоаси мураббийлар штаби тўлиқ таркиби билан истеъфога чиқарилиши ҳақида қарор қабул қилинди.

Ўзбекистон футзал федерацияси Ижроия қўмитаси миллий терма жамоа мураббийлар штабига ўтган давр мобайнидаги фаолияти учун миннатдорлик билдириб, келгусидаги фаолиятида уларга омад тилади.

Ўзбекистон миллий футзал терма жамоасининг янги мураббийлар штаби яқин кунларда кенг жамоатчилик ва мухлислар эътиборига ҳавола этилади", – дейилади хабарда.

Ҳавола :

Манба : Ўзбекистон футзал федерацияси матбуот хизмати

Янгиликларни Телеграмда ўқинг!

Рейтинг: +10