Бразилияда ғавғо: "Фламенго" юлдузи пул тикканликда айбланиб дисквалификация қилинди

Олий спорт трибуналининг тартиб-интизом қўмитаси (STJD) 34 ёшли футболчини ҳалол ўйин тамойилларини бузганликда ва миллий чемпионат учрашуви натижасига таъсир ўтказишга уринишда айбдор деб топди.

Гап 2023 йилнинг ноябрида "Сантос"га қарши ўйин (1:2) ҳақида кетмоқда. Ўшанда Энрике атайин сариқ карточка олган, бу тергов маълум қилганидек, букмекерлик пул тикишларида фойда келтирган. Бунинг учун футболчи 12 ўйинга дисквалификация қилинди ва 60 минг реал (тахминан 11 минг доллар) жаримага тортилди. Ўйинчи апелляция бериш ҳуқуқини сақлаб қолади.

STJD'нинг қайд этишича, дастлаб иш фақат билвосита маълумотларга асосланганди, аммо ҳал қилувчи омиллар ҳужумчининг схемада иштирок этганини тасдиқловчи федерал полиция материаллари бўлди. Прокуратура маълумотларига кўра, футболчининг ҳаракатлари "Фламенго"га зарар етказган ва ўйин натижасига таъсир қилиши мумкин эди.

Шунингдек, 4 нафар ҳаваскор футболчи, жумладан, Бруно Энрикенинг укаси Вандер Нуньес Пинту Жуниор ҳам жазоланди. Бошқа айбланувчилар жазодан қутулиб қолишди, чунки улар спорт адлия тизимининг бир қисми эмас.

Аввалроқ Энрике жиноий жазо – 18 йилгача қамоқ ва 2 миллион реал (тахминан 362 минг доллар) жаримага тортилиши мумкинлиги ҳақида хабар берилганди.

Бруно Энрике 2019 йилдан буён "Фламенго" сафида тўп тепмоқда. У жорий мавсум 40 ўйинда майдонга тушиб, 9 та гол урди ва 2 та голли узатмани амалга оширди.