Биз сени танидик «Ливерпуль»

Кўзлари қонга тўлган «Ливерпуль» .

Премьер-лига планетамизнинг биринчи рақамли чемпионати эканлигини мана шундай ўйинлар орқали исботлаб беради ва исботлаб келмоқда ҳам. Бугун футболчилар мураббий учун, Клопп учун ўйнашди. Майдонда футбол ўлчовларига сиғмайдиган воқеалар бўлиб кетди. Аслида “Манчестер Юнайтед” у қадар ёмон ўйнамади, шунчаки «Энфилд» йигитларининг кўзларида олов ёнди. Робертсон илк таймнинг энг яхши футболчиси бўлди, Тренд ҳимояда хатоларга йўл қўймади, Ван Дейк қалъа қўмондонлигига қайтди янги келганлар (Нунес ва Гакпо иккаласида ҳам дубл) жамоанинг бир бўлаги сифатида синхронлашди. Баҳс катта эҳтимол «Ливерпуль»нинг жорий мавсумдаги бурилиш нуқтаси бўлади. Биз ниҳоят «Ливерпуль»ни танидик. Клопп бунга мажбур қилди барчани. Принципиал рақиб устидан йирик ғалаба омадсиз ўйинлардаги ғуборларни ювиб кетади. Ниҳоят Клопп янги келганларни жамоа ўйинига сингдира олди.

“Манчестер Юнайтед”да ҳаммаси жойида.

“Қизил иблислар” йирик мағлубиятга муносиб эмасдилар. Рақиб томонидан берилган 8 аниқ зарбанинг 7 таси гол билан якунланди. Шунчаки бугунги кеча «Ливерпуль»ники эди. Тен Хаг ўйин якунигача хотиржам тарзда баҳсни кузатди. Бугун Клопп жамоаси шундай ўйнадики исталган рақиб «Энфилд» сехрига дош беролмасди. “Манчестер Юнайтед”нинг кейинги ўйини Европа Лигаси доирасида «Бетис»га қарши бўларкан (катта эҳтимол йирик ғалаба қозонилади). Испанлар “Олд Траффорд”га ҳаммасига шай ҳолатда келаверишсин (уларга осон бўлмайди). Тен Хаг ва «Манчестер» билан ҳаммаси жойида, бугун шунчаки уларнинг куни эмас эди.

Жалолиддин Халилов