Биринчи лига, 16-тур олдидан. 3-ўрин кимга “Оқ-тепа” ёки “Обод”?

Шунингдек 5-ўрин эгаси аниқ. 3-ўрин учун кураш давом этмоқда. Унда ким ғолиб чиқишини бугун билиб оламиз. Бу борада кураш “Оқ-тепа” ва “Обод” ўртасида кечмоқда.  Шунингдек 16-турнинг қолган жуфтликлари ҳам қизиқарли ўтиши кутилмоқда. Бўлажак баҳслар олдидан кимнинг имкониятини қандай кўряпсиз?

14:00. “Шўртан” – “Истиқлол”. 90х10.
Дастлабки учрашуви 0:3.
Кичик олтин медалларни ўтган турда расмийлаштирган “Шўртан” бугун ҳам ўз мухлислари қаршисида ғалаба қозониб, чемпионатни яхши кайфиятда тугатса керак. Ўтган турда “Машъал-2”га қарши баҳсда ўз дарвозасидан нақд 6та (!) тўп ўтказиб юборган “Истиқлол”ни бугун Ғузорда ғалаба билан қайтиши жуда қийин масала. Яна ким билади дейсиз.

14:00. “Машъал-2” – “Пахтакор-2”. 70х30.
Дастлабки учрашуви 0:0.
Икки фарм-клублар ўртасида кечадиган мазкур баҳс шиддатли ўтиши тайин. Асосан академия тарбияланувчиларидан ташкил топган жамоалар шубҳасиз ғалаба илинжида майдонга чиқади. Бу борада имконият кўпроқ мезбонларда. Дилшод Андаев жамоасининг кайфияти ҳам юқори даражада. Лекин “Пахтакор-2” сенсация қайд этиши ҳам мумкин.

14:00. “Шердор” – “УзДонгЖу”. 50х50.
Дастлабки учрашуви 4:0.
Уй жамоасига айланиб қолган “Шердор” бугун ўз майдонида ғалаба қозониб, турнир жадвалида хавфли зонани тарк этишга уриниши аниқ. Лекин “УзДонгЖу” ҳам сафарда барқарор ўйин намойиш этиб келмоқда. Шу боис мезбонларга осон бўлмаслиги турган гап. Балки 5-ўринни нақд қилган андижонликлар ҳотиржамликка берилиб кетса, бу “Шердор” учун қўл келар.
 
14:00. “Аланга” – “Хотира-79”. 80х20.
Дастлабки учрашуви 0:1.
Катта эхтимол билан бугунги баҳс мезбонлар фойдасига ҳал бўлади. Чунки “Аланга” бугунги кунда “Хотира-79”дан ҳар томонлама кучли. Қолаверса учрашув Косонда ўтиши уларнинг имкониятини бирмунча оширмоқда. Сафарга битта дарвозабон билан борган уйчиликлар бундан панд емаса бўлгани.
 
14:00. “Зомин” – “Оқ-тепа”. 40х60.
Дастлабки учрашуви 4:3.
“Зомин” ўз уйида осонликча очко улашадиган клуб эмас деб ҳар гал айтиб келамиз. Гарчи молиявий жиҳатдан муаммолар юзага келган бўлсада, йигитлар очко жамғариш мақсадида борини бериб ўйнамоқда. Лекин тошкентликлар ҳам бугун сафарда ғалаба қозониб чемпионатни 3-ўринда якунлашга интилади. Фурқат Эсонбоев жамоасининг имконияти бироз юқорироқ кўринмоқда.  

14:00. “Ғаллакор-Автомобилчи” – “НБУ-Осиё”. 40х60.
Дастлабки учрашуви 3:2.
Мазкур баҳсда ҳам меҳмонларнинг имконияти юқоридек кўринмоқда. Ғаллаоролликлар ҳар галгидек жорий мавсумни ҳам юқори суръатда ўтказа олмади. Буни жамоа мураббийлари молиявий муаммо юзага келаётгани билан изоҳлайди. Ҳозир қайси жамоада бундай муаммо йўқ дейсиз. Хуллас таркибни кескин ёшартириб юборган “Ғаллакор-Автомобильчи” бу йил мухлисларин қувонтира олмади. Бугунги баҳсда ҳам уларнинг ғалабага бўлган имконияти нисбатан паст. Чунки тажрибали ўйинчиларга эга бўлган “НБУ-Осиё” сафардан қуруқ қайтмасликка уринади.

14:00. “Хоразм” – “Обод”. 30х70
Дастлабки учрашуви 3:0.
“Хоразм”да ҳам шунга ўхшаш холат. Мавсум ўрталарига келганида бош мураббийсиз қолиб кетган жамоани ўйинларга маъмур (администратор) олиб борганидан кейин яна нима кутиш мумкин?! Урганчлик мухлислар жамоани олий лигага қайтишини кутаётган бир пайтда клубда олиб борилаётган сиёсатни кўрсангиз ачинасиз. Барқарорликка эришиш учун ҳаракатни ўзи йўқ. Пул муаммосини гапириб, қолган жамоалар ҳам биз каби дея изоҳлашга уринадиган ходимлари бор. Гапнинг индаллосини айтганда бугун тошкентликлар ғалаба қозонса керак. 

14:00. “Орол” – “Қўқон-1912”. 50х50.
Дастлабки учрашуви 0:1.
Бугун Нукусда қизиқарли ўйин бўлади. Турнинг марказий учрашуви деса ҳам бўлади. Имкониятларни тенг дея баҳоладик. Балки қўқонлик юзерларимизга бу ёқмас, лекин “Орол” ҳам ўз уйида осонликча таслим бўлмайди. Боз устига улар ўтган турда “Обод”га имкониятни бой берди. Ушбу мағлубиятдан кейин мухлисларини қандай бўлмасин хурсанд этишга ҳаракат қилса керак. Яна ким билади дейиз?

Бу шунчаки бизнинг тахминларимиз эди. Қолганини ўйин кўрсатади.

Исломбек Рустамбеков.