Бахтиёр Ашурматов: "Биз билан ўйинда айрим жамоалар ғалабани ушлаб қолиш учун майдонда "ётиб олади"

- Ўйин ҳақида

- Гапнинг очиғи, бугунги ўйинда аламли дуранг натижа қайд этилди. Учрашув охиригача ғалабани сақлаб қолиш учун бизга тажриба етишмади. Ўйин охирида темпни тушириб, тўп назоратини қўлга олиш ўрнига рақибга ҳужум ташкил этиш учун имкон бериб қўйдик. Бирорта футболчимиз бу борада ҳаракат қилмади. Биз билан ўйинда айрим жамоалар ғалабани ушлаб қолиш учун майдонда "ётиб олади". Шу каби майда сабаблар туфайли тайёр ғалабани қўлдан чиқардик. "Машъал"нинг ҳаракатларига ҳам кўз юмиш керак эмас, улар охиригача курашди.

- Анвар Ҳожимирзаев ва Илҳом Ваҳобовнинг ҳаракатларига қандай баҳо берасиз?

- Сўнги вақтларда бизда жароҳат олган футболчилар кўпайиб бормоқда. Жумладан, Мурод Холмуҳаммедов жароҳат олди, Фарҳод Бекмуродов ўйинга тайёр эмасди. Шу сабаб таркибда ўзгаришларга қўл урдик. Бир хил таркиб билан ўйнашга имкон бўлмаяпти. Улар яхши таасурот қолдиришди. Футболда шунақа, футболчи учун ўйин имтиҳондек гап. Ўзингни кўрсат ва асосий таркибга кир. Шу сабабли ҳаммада имконият бор, ўзини кўрсатганлар, жонини бериб ўйнаганлар кейинги ўйинда ҳам асосий таркибдаги жойини кафолатлаши мумкин. 

Бугунги ўйинда "Машъал"нинг имкониятлари стандарт вазиятларда бўлди. Улар бурчак зарбасидан сўнг хавфли вазиятни юзага келтиришди. Ўйиндан олдин рақибни ўрганганмиз. Хатто ҳар бир футболчи учун алоҳида ўйинчимизни бириктирамиз. Хавфли вазият бартараф этилмагунига қадар ўзига бириктирилган футболчи учун жавобгар бўлади. Негадир эътиборсизликка йўл қўйдик, стандарт вазиятларда рақибга гол уриш имконияти бериб қўйилди. "Бунёдкор" билан ўйинда ҳам стандарт вазиятда 2 та гол ўтказиб юборгандик. Балки ўйин охирида вақтни чўзишимиз керакмиди?! Уйда очко йўқотсак, юқори ўриндаги жамоаларга етиб олиш қийин бўлади.

- Мурод Холмуҳаммедов кейинги ўйинда майдонга тушиши мумкинми?

- Йўқ, Холмуҳаммедов ҳали умумий машғулотларга киришгани йўқ. Кейинги ўйингача вақт кам, тайёр бўлмаса керак. Барча жароҳат олган футболчиларимиз тезроқ соғайиб сафимизга қўшилишини тилаб қоламиз.