Баҳром Ҳайдаров: "Футболчилар мураббийсиз ҳам ғалаба қозонса бўлади"

- Ўйинин яхши бошладик, натижаси гол билан тугади. Биринчи голдан кейин йигитларни бошқаролмай қолдик, улар бўшашишди ва тўпни кўпроқ ушлашга ўтиб олишди. Бўшашиш сабабли гол ўтказиб юбордик. Агарда ўйиннинг қолган қисмини бошлаганимиз каби давом эттирганимизда голлар ўтказиб юбормасдик. Иккинчи бўлимда рақиб бир киши кам бўлиб қолганида футболчилар масъулиятни бўйнига олишлари керак. Лекин бизда бундай бўлмади. Барча футболчиларимиз тўпни ушлаб туриб, жарима майдончаси ичига ёриб киришдан қўрқди. Рақиб 10 киши бўлиб қолгани сабабли чуқур ҳимояланишга мажбур бўлди, бундай пайтда албатта, қанотлардан ҳам узатмалар бўлиши керак. Бундай ҳолатда бирор футболчи индивидуал маҳорат эвазига масъулиятни бўйнига олиши керак эди. Кейинчалик қарши ҳужумда иккинчи голни ўтказиб юбордик. Умумий ўйин бўйича муаммолар йўқ эди. Нафақат гол уришда, балки кўп эпизодларда руҳий ҳолатжа муаммолар ва маҳорат етишмаяпти. Оддий жойларда тўпни йўқотиб қўйсак, бизга қарши голли ҳужумлар бўлмоқда. Шуни ҳисобига мағлуб бўлдик деб ўйлайман. Ўйинни тахлил қилиб чиқиш керак.

- Бу жамоанинг кетма-кет олтинчи мағлубияти бўлди. Бунда мураббийлар штабининг ҳам айби бордир?

- Албатта. Бугун эпизодларни гапирган бўлсам, умумий 6 ўйинда мағлуб бўлдик. Бунда фақатгина футболчиларнинг эмас, биз мураббийларнинг ҳам айби бор. Чунки кўп қарорларни бош мураббий, яъни, мен чиқараман. "Машъал"га қарши ўйиндан кейин раҳбарият билан гаплашгандик. Уларга раҳмат айтаман, бизга ишониб, ишлашда давом этяпмиз. Натижа учун курашяпмиз, лекин бу жуда қийин бўлмоқда. Лекин бизга шу ҳолатдан ўтиб кетиш учун битта қадам етишмаяпти. Жамоани олиб чиқиб кета оламиз. Ўтган йили Про-лигада ҳам шундай ҳолатлар бўлганди. Олдимизда биринчи давранинг сўнгги ўйини кутиб турибди. Бунда жамоа максимал куч билан ўйнаб, 3 очко учун жонини беради. Бошқа иложимиз йўқ. Шу ўйиндан кейин жамоани кучайтиришга, иккинчи даврага яхши тайёрлашга ва селекция орқали жамоага футболчи олиб келишга вақт бўлади. Мураббийлар штабига келсак, биз ҳалол йўл билан ишлаяпмиз. Бунинг устида биз ҳам ишлаймиз. Ҳар доим ҳар бир ўйиндан кейин ўзимизга саволлар берамиз. Футболчилар ҳам шуни ҳис қилишлари керакки, учралган олти мағлубиятнинг бирортасида мураббийсиз ҳам ютса бўларди, футболчилик пайтимизда шундай бўлган. Ўзларига ҳам айтганман, мана интерьюда ҳам айтаман: футболчилар ўзлари йиғилиб, мураббийсиз ҳам бир ўйинни ютса бўлади. Бу орқали футболчиларга айбни тўнкаб қўймаяпман. Биз ўзимизни топиб олишимиз керак, футболчилар ҳам кейинги ўйинлар учун ўзлари тўпланишса яхши бўларди.