Аёллар футболи. Футзал терма жамоасини Осиё чемпионатига кузатиш маросими бўлиб ўтди
30 апр 2018 16:54
Янгиликлар

Аёллар футболи. Футзал терма жамоасини Осиё чемпионатига кузатиш маросими бўлиб ўтди

Футзал бўйича Ўзбекистон аёллар терма жамоаси шу йилнинг 2-12 май кунлари Таиландда ўтадиган Осиё чемпионатига Тошкентда тайёргарлик кўраётган эди.

Футзалчи қизларимиз “Чиғатой” спорт базасида жойлашган ҳолда “Бунёдкор” стадионининг залида машғулотлар олиб боришди.

Бугун “Чиғатой” спорт базасида футзал бўйича Ўзбекистон аёллар терма жамоасини Осиё чемпионатига кузатиш маросими бўлиб ўтди.

Маросимда ЎФА ва ПФЛ раҳбарияти иштирок этди. Тадбирда сўзга чиққанлар футзалчи қизларимизга бўлажак мусобақада омад ёр бўлишини тилашди. Ўз ўрнида футзал бўйича Ўзбекистон аёллар терма жамоаси бош мураббийи Аваз Махсумов Ўзбекистон футбол Ассоциацияси томонидан терма жамоа учун яратиб берилган шарт-шароитлар учун миннатдорчилик изҳор қилди. Терма жамоа сардори Мавлуда Мунавварова эса бўлажак мусобақада яхши иштирок этгган ҳолда, юртимиз шаънини Осиё чемпионатида муносиб ҳимоя қилишга ваъда берди.

Футзал бўйича аёллар ўртасидаги Осиё чемпионатида Ўзбекистон аёллар терма жамоаси билан биргаликда Таиланд, Эрон, Япония, Малайзия, Хитой, Гонк Конг, Вьетнам, Баҳрайн, Хитой Тайпейи, Ливан, Макао, Туркманистон, Бангладеш ҳамда Индонезия терма жамоалари иштирок этишади.

Ўзбекистон терма жамоаси амалдаги чемпион Эрон ва мусобақа дебютанти Туркманистон жамоалари билан бир гуруҳдан ўрин олган. Жамоамиз дастлабки ўйинини 5 май куни Туркманистон жамоасига қарши, иккинчи ўйинни эса 7 май куни Эронга қарши ўтказади.

05.05.2018 Ўзбекистон – Туркманистон

07.05.2018 Эрон - Ўзбекистон

Футзал бўйича Ўзбекистон аёллар терма жамоаси аъзолари бугун тунда Таиландга йўл олишади.

Ҳавола :

Манба : the-uff.com

Янгиликларни Телеграмда ўқинг!

Рейтинг: +1