“Аякс” билан 3 бора Эредивизини қўлга киритган футболчи 29 ёшида вафот этди

Конго ДР термаси собиқ хавбеки Жоди Лукоки 29 ёшида вафот этди. У 2011 йил “Аякс” сафида дебют қилиб, жамоа либосида 39 та учрашув ўтказганди. Шунингдек, ярим ҳимоячи “Камбюр”, “Зволле”, “Лудогорец”, “Малатьяспор” каби жамоалар шарафини ҳимоя қилган.

Охирги клуби эса “Твенте” бўлган ва оёғидан олган оғир жароҳати туфайли февралдан бери клубсиз қолганди.

Футболчи амстердамликлар билан 3 бор Нидерландия чемпионлигини қўлга киритган, шунингдек, у “Лудогорец” билан 4 марта Болгария чемпионлиги ҳамда 2 бора мамлакат Суперкубоги соҳибига айланганди.

Маълумот ўрнида, Жоди Лукоки терма жамоадаги дебютини 2015 йил март ойида Ироққа қарши ўтказган.