"Ал Ваҳда" бош мураббийи: "Тўрт нафар футболчимиз бирданига жароҳат олди"

"Эртага гуруҳдаги биринчи ўйин бўлади. Шахсан мен қийин ўйин бўлишини кутаяпман. Илк ўйин масъулиятли бўлади. Биз Тошкентга 4 нафар асосий таркиб футболчимизни олиб кела олмадик. Ушбу етакчиларсиз ўйнашимиз бизга бироз қийинчилик туғдириши мумкин", - дейди "Ал Ваҳда" бош мураббийи Лауренциу Регекампф.

"Мен ҳам мураббийнинг фикрларига қўшиламан. Баъзи футболчиларнинг бу ерга кела олмаганлиги, Тошкентда бироз совуқ об-ҳаво ҳукмронлиг ва майдон бироз кичикроқ эканлиги ўйинга таъсир қилиши мумкин. Аммо бу баҳона бўла олмайди", - дейди венгриялик Балаж Джуджак.

- "Локомотив" бу йилдаги илк расмий баҳсни ўтказиши "Ал Ваҳда"га фойдами?
- Рақиб сафида тажрибали ва маҳоратли футболчилар бор. Бундан ташқари "Локомотив" ўртоқлик учрашувларини ўтказди. Шундай экан илк ўйин эканлиги у қадар билинмайди деб ҳисоблайман.

- "Ал Ваҳда" сафида 7 февраль куни майдонга тушган бир йўла уч нафар легионер Себастьян Тальябу, Мурод Батна ва Рим Чанг Вунинг бирданига жароҳат олгани жуда шубҳали. Улар айнан қачон ва қаерда жароҳат олишди?  
- Тўғри улар олдинги ўйинда қатнашишганди. Улар бирданига жароҳат олишди. Футболда шундай ҳолатлар ҳам бўлиб туради. Тўрт футболчи ҳам жароҳат олишгани учун Тошкентга келишмади. Бу муаммо бизни янада кучли қилади. Таркбимизда қолган футболчилар уларнинг йўқлигини билдиришмайди деб умид қиламан. Асосийси "Локомотив" билан баҳсда ўз ўйинимизни кўрсата олсак бас.

- Европа клубларида ўйнаган футболчи сифатида Осиё чемпионлар лигаси ҳақида қандай фикрдасиз? Ўтган йил "Ал Ваҳда" билан ОЧЛда яхши натижа қайд эта олмагандингиз...
Балаж Джуджак: - ОЧЛ даражаси ҳам юқори ҳисобланади. Ушбу мусобақада ўйнаётганимдан хурсандман. Ўтган мавсумда ўзимиз кутган натижани қайд эта олмадик. Насиб қилса бу мавсумда гуруҳдан чиқиб имкон қадар узоқроққа боришга уринамиз.

Нарзулла Сайдуллаев