Акмал Шораҳмедов: "Ким пиёда юрса, термага бошқа чақирилмаслигини яхши билади"

- Бизда рақибнинг қандай ўйин кўрсатишига қаралмаяпти. Кузатаётганингиздек, ҳар ўйинда бизда таркиб ўзгармоқда. Илк навбатда ҳимоя ва марказий ярим ҳимояга эътибор берилмоқда. Кейинги йиғинларда биз ҳужумкорликка эътибор қаратамиз. Ҳаммаси босқичма босқич амалга оширилмоқда.

Қатар юқори техникага ва испаниялик мураббийга эга терма эканлигини биламиз. Рақиб ярим майдонида ҳудудлар очилиб қолиши учун биз тўпни атайин уларга бериб қўйдик. Қатар термасининг қандай ўйин кўрсатишига аҳамият бермадик. Асосий эътибор ўз хатоларимизни тўғрилашда бўлди.

"Пахтакор"да менинг қанотимда ҳужумчи ўйнайди. У ерда мен очилсам ҳам, тўпни оширишмайди, уларнинг ўзлари ҳужумга ўтишади. "Пахтакор"да функция умуман бошқача. Бу ерда эса тўхтаб қоладиган футболчи кейинги йиғинларга чақирилмаслигини яхши билади. Ким чарчаса, ўзгартирилиши мумкин. Аммо кимки орқага қайтмаса, оёғини курашдан олиб қочса, майдонда пиёда юрса, жамоада бўлмайди, буни барча яхши билади. Шунинг учун ҳам барча тўхтамасдан югурмоқда. Купер жуда ҳам талабчан мураббий. Кимдир ҳужумга ўтишда ёки ҳимояга қайтишда пиёда юрадиган бўлса, терма билан хайрлашади.

Толибжон Қосимов суҳбатлашди