Ўсмирларимиз биринчи ўйинда ғалаба қозонишди (фотогалерея)

Хабарингиз бор, Эрон термаси билан учта назорат ўйини ўтказиш режага киритилган ва шундан биринчиси бўлиб ўтди. Навбатдаги икки ўйин 18 ва 20 август куни яна “Жар” стадионида ўтказилади. 

Биринчи беллашувда Дилшод Нуралиев шогирдлари рақиб устидан 2:0 ҳисобида ғалаба қозонишди. Ўсмирларимиз ҳар бир бўлимда биттадан гол уришди. Биринчи таймда Иброҳим Абдуллаев ҳисобни очган бўлса, иккинчи бўлимда Иззатилла Абдуллаев ҳисобни 2:0га етказди.

Умуман олганда ўйин тенг курашлар остида кечди. Эронликлар ҳам ёмон таассурот қолдиришмади. Улар дастлабки йигирма дақиқани яхши ўтказишди, кейин эса ўйин тизгинини бўшаштириб юборишди. Бундан вакилларимиз унумли фойдаланиб, кетма-кет ҳужумларни ташкил этишди.

Қизиғи шундаки, баҳс якунига етгач, эронликлар таклифига кўра пенальтилар серияси амалга оширилди. Аммо бунда 5:4 ҳисобида форсийларнинг қўли баланд келди.

Ўртоқлик учрашуви
Ўзбекистон (U-17) - Эрон (U-17) - 2:0
Голлар: Иброҳим Абдуллаев, Иззатилла Абдуллаев.
Ўзбекистон: Сарвар Каримов, Акром Комилов, Одил Ҳамробеков, Иброҳим Абдуллаев, Жамшид Болтабоев, Шаҳзод Очилов, Равшан Хурсанов, Ислом Каримов, Жавоҳир Сиддиқов, Иззатилла Абдуллаев, Акобир Тўраев.
Ҳакамлар: А.Асимов, Р.Серазетдинов, А.Усмонов, В.Агишев.

18 август. “Жар” стадиони. 

Хайрулла Холиқов