Зоҳир Пиримов: "Пас"ни кўрибоқ зарба бериш ҳақида ўйладим"

"Албатта, бир жамоа сафида узоқ муддат тўп тепишни ҳамма футболчи ҳам истайди. 2008 йил жамоага таклиф қилинганимдан бери клубда мураббий ўзгармади. Айнан шу омил муваффақият гарови бўлди деб айтган бўлардим. Боиси мураббий алмашаверса ҳам футболчининг ўйинида ўзгариш бўлиши мумкин. Ундан ташқари, менга ишонишди", - дейди "Олмалиқ" сафида 150 учрашувни ўтказган Пиримов.

- Буни мураббий ҳам айтиб ўтди, фаолиятингизга назар ташласак, доим барқарор ўйнай олмаяпсиз. Бунга нима сабаб бўляпти?

- Тўғри, буни тан оламан. Мавсум бошида бироз ортда қоламан ва яхши ҳолатга киришда қийналаман. Сал вақт ўтгач, суръатга тушиб оламан. 

- Ўйинни захирадан тушиб, давом эттирдингиз. Захирада ўтирган пайтингиз "Қўқон-1912"нинг ожиз нуқталарини кўра олганмидингиз?

- Шундай деса ҳам бўлади. "Қўқон-1912" ўз жарима майдончаси ичида жуда ҳам зич ўйин намойиш этаётган эди. Ҳимоя ва дарвозабон анча яхши ҳаракат қилди. 

- Голга қандай шарҳ берасиз? 

- Яна 100та шундай имконият бўлса ҳам бундай гол уриш қийин. Павленко тўпни ҳаволатиб оширганидан кейин уни оёғимга тўғри тушишини ҳис қилдим ва ўйлаб ўтирмасдан дарвозани нишонга олдим. Агар зарбани посбон қайтарганида ҳам уни ушлаб олиши қийин бўларди, бирон футболчига тегиб гол бўлиши мумкин эди. Лекин унга ҳожат қолмади.

 Нодирхўжа Юлдашев